Երեւանի սրտում տեղադրուեց աշխարհահռչակ գիտնական Վիկտոր
Համբարձումեանի արձանը
15-12-2009 12:30:00 | Հայաստան | Հասարակութիւն
ԵՐԵՎԱՆ, 15 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ:
Դեկտեմբերի 15-ին Երեւանում, Աստղադիտարանի հարեւանութեամբ
հանդիսավորապես բացուեց մեծանուն հայ աստղագէտ, ակադեմիկոս Վիկտոր
Համբարձումեանի արձանը: Հանդիսութեանը մասնակցում էր Հայաստանի
նախագահ Սերժ Սարգսեանը:
Գիտնականի բրոնզաձոյլ արձանը կանգնած է պատուանդանին, ասես,
գալակտիկայի կենտրոնում, խորհրդանշելով հավերժություն եւ
անսահմանություն: Արձանի հեղինակները կոմպոզիցիայի հիմքում դրել են
Գրիգոր Նարեկացու խօսքը` «անմատչելի հեռաւոր եւ անընդմիջելի
մերձաւոր»: Գիտնականը պատկերուած է շարժման մէջ, ինչպիսին էր իր
ապրած եւ կերտած ժամանակաշրջանը` զարգացում, շարժում եւ առաջընթաց:
Արձանը քանդակագործ Տարիել Յակոբեանի հեղինակած թւով 4-րդ
Վ.Համբարձումեանի արձանն է` առաջին երեքը տեղադրուել են Երեւանի
պետհամալսարանում, Բիւրականի աստղադիտարանում եւ Թեհրանում Իրանի
նախագահի` աշխարհահռչակ գիտնականների պարտեզում:
Արձանի տեղադրմամբ, ինչպէս արարողութեանը նշեց Հայաստանի
Գիտութիւնների ազգային ակադեմիայի պրեզիդենտ Ռադիկ Մարտիրոսեանը,
աւարտւում է գիտնականի ծննդեան 100-ամեայ յոբելեանին նուիրուած
միջոցառումների շարքը` գիտաժողովներ Մոսկուայում, Պետերբուրգում,
Մինսկում, Փարիզում, յոբելեանը նշել էր նաեւ ԵՈՒՆԵՍԿՕ-ն:
Ռ.Մարտիրոսեանը պատահական չհամարեց արձանի տեղադրման վայրը`
Վ.Համբարձումեանը 1943թ. վերադառնալով հայրենիք, իր աշխատանքը
սկսեց Երեւանի փոքրիկ աստղադիտարանում, որը Երեւանի առաջին գլխաւոր
ճարտարապետ Ալեքսանդր Թամանյանի առաջին գործերից էր:
Երեւանի պետհամալսարանի ռեկտոր Արամ Սիմոնեանն էլ իր հերթին
նշեց. «Համաշխարհային աստղագիտութեան մէջ բազմաթիւ գիտաճյուղերի
սկզբնավորողն է նա, այսօր աստղաֆիզիկայի եւ այլ բնագաւառներում
կիրառուող գիտական շատ սկզբունքներ կոչւում են Վիկտոր
Համբարձումեանի անունով»: Վ.Համբարձումեանը 1946թ. հիմնադրել է
նաեւ ԵՊՀ ընդհանուր ֆիզիկայի եւ աստղագիտութեան ամբիոնն ու
Բիւրականի աստղադիտարանը, որոնք ներկայումս կոչւում են նրա
անունով: Ա.Սիմոնեանը կարեւորեց նաեւ գիտնականի քաղաքացիական
դիրքորոշումը արցախեան հարցում. արցախեան պայքարի դժուարագոյն
օրերին. նա իր այդ տարիքում «գիտակցուած անձնազոհութեան դիմեց`
մոսկովեան հիւրանոցում հացադուլ անելով` ընդդէմ խորհրդային
հակահայ քաղաքականութեան եւ յանուն Արցախը Հայաստանին
վերամիավորելու արդար պահանջի»:
Բիւրականի աստղադիտարանի տնօրէն Հայկ Յարութիւնեանի
դիտարկմամբ, Երեւանում կարելի է հանդիպել միայն մինչեւ 7-րդ դարի
հայ գիտնականների արձանների, եւ Վ.Համբարձումեանի` 20-րդ դարի հայ
գիտնականի արձանի տեղադրումը, նրա գնահատմամբ, արդի հայ գիտութեան
արժեւորումն է: