ԵՐԵՎԱՆ, 14 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: ԱՄՆ-ի պետքարտուղարը 2009թ.-ի «Դիւանագիտութիւնը յանուն մարդու իրաւունքների» մրցանակը շնորհել է ՀՀ-ում ԱՄՆ-ի դեսպան Մարի Լ. Յովանովիչին: Այս մասին «ՆՏ»-ին յայտնեցին ԱՄՆ դեսպանատնից: «Դիւանագիտութիւնը յանուն մարդու իրաւունքների» ամենամեայ մրցանակը շնորհւում է ԱՄՆ-ի այն դեսպանին, ով իր նշանակման երկրում բացառիկ նուիրում է ցուցաբերում մարդու իրաւունքների պաշտպանութեան եւ կառավարման ժողովրդավարական սկզբունքների առաջ մղման հարցում: Մարի Լ. Յովանովիչին ընտրելով այս մրցանակի համար, պետքարտուղար Հ.Քլինթոնը առանձնացրել է սկզբունքային առաջնորդման ու դիւանագիտական միջոցների օգտագործման նրա նորարարական մօտեցումը մարդու իրաւունքները եւ ժողովրդավարութիւնը, որպէս Հայաստանի եւ ԱՄՆ-ի միջեւ երկկողմ յարաբերութիւնների կարյոր բաղադրիչ, խթանելու եւ պաշտպանելու հարցում: Պետքարտուղարը առանձնակի նշել է դեսպան Յովանովիչի եւ նրա ղեկավարած թիմի շահապաշտպան գործունութիւնն ուղղուած 2008թ.-ի փետրուարին կայացած վիճահարոյց ընտրութիւններից յետոյ ձերբակալուածների հանդէպ իրավաչափ գործընթացների ու թափանցիկ քննությունների ապահովմանը, եւ դեսպանի ջանքերն ուղղուած Հայաստանում ընտրական գործընթացների բարելաւմանը` միաժամանակ ապահովելով դրական յարաբերութիւններ Հայաստանի կառավարութեան հետ: «Ինձ համար մեծ պատիւ է արժանանալ այս մրցանակին, սակայն այդ մրցանակին իրավամբ արժանի են Հայաստանում մարդու իրաւունքների ոլորտում բարեփոխումներ իրականացնողները` լինեն կառավարութիւնից, քաղաքացիական հասարակութիւնից, թէ լրատվամիջոցներից»,- ասել է Մ.Յովանովիչը: Նա միաժամանակ նշել է, որ 18 տարիների ընթացքում Հայաստանը առաջընթաց շատ է ունեցել, սակայն մարդու իրաւունքների ոլորտում դեռ շատ անելիք կայ:

---