Երեւանում կայացաւ ՀՀ-ի ԱԺ-ի եւ ՌԴ-ի Դաշնային ժողովի միջեւ
համագործակցութեան միջխորհրդարանական յանձնաժողովի 17-րդ նիստը
09-11-2009 18:30:00 | Հայաստան | Տնտեսութիւն
ԵՐԵՎԱՆ, 9 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Նոյեմբերի 9-ին Երեւանում
կայացել է Հայաստանի Ազգային Ժողովի եւ Ռուսաստանի Դաշնութեան
Դաշնային ժողովի միջեւ համագործակցութեան միջխորհրդարանական
յանձնաժողովի 17-րդ նիստը: Ըստ ՀՀ ԱԺ-ի Հասարակայնութեան հետ
կապերի վարչութեան հաղորդագրութեան, նիստում քննարկուել է
տրանսպորտի եւ տրանսպորտային բեռնափոխադրումների ոլորտում երկկողմ
համագործակցութեան վերաբերեալ հարցը, ինչպէս նաեւ իրանական ու
թուրքական երկաթուղուն միանալու եւ ապրանքափոխադրումների ծաւալները
մեծացնելու, դրանք աւելի արդիւնաւէտ դարձնելու հեռանկարները:
ԱԺ-ի Տնտեսական հարցերի մշտական յանձնաժողովի անդամ Հերմինէ
Նաղդալյանը կարեւորել է տրանսպորտային, յատկապէս երկաթուղային
բեռնափոխադրումների դերն ու նշանակութիւնը շրջափակման մէջ գտնուող
Հայաստանի տնտեսութեան համար: Նա յայտնել է նաեւ, որ կոնցեսիոն
պայմանագրով հայկական երկաթուղին տնօրինող «Հարաւկովկասեան
երկաթուղի» ընկերութեան աշխատանքներում առկայ են որոշակի
բացթողումներ: Նա, մասնաւորապէս, վտանգաւոր է համարել
բեռնափոխադրումներին առնչուող բիւրոկրատական քաշքշուկները,
համակարգի մոնոպոլիզացման բացասական հետեւանքները, ազատ եւ
չհիմնաւորուած գնային քաղաքականութիւնը: Հ.Նաղդալյանը հոյս է
յայտնել, որ համատեղ հետեւողական աշխատանքը միայն կարող է
կարգուկանոն մտցնել վերոհիշյալ հարցերում:
Ռուսական կողմից նոյն հարցի վերաբերեալ հանդէս է եկել
Հարաւկովկասեան երկաթգծի գլխաւոր տնօրէն Շեւկետ Շայդուլինը, ով
նշել է, որ իրենց ընկերութեան գլխաւոր նպատակն է ապահովել ոլորտի
շարունակական արդիւնաւէտութիւնն ու ֆինանսական կայունութիւնը,
բարձրացնել տրանսպորտային սպասարկման որակը, Հայաստանում զարգացնել
տրանսպորտային արտադրութիւնը եւ ինտեգրուել եւրասիական
տրանսպորտային համակարգին: Նա հանգամանալից ներկայացրել է կատարուված
վերանորոգման ու տեխնիկական վերազինման աշխատանքները, առաջիկայ
ծրագրերը:
Նշուվել է նաեւ, որ աշխատանքների դանդաղումը պայմանաւորուած է
ֆինանսատնտեսական ճգնաժամի հարուցած դժուարութիւններով, որոնց
պատճառով նուազել է բեռնափոխադրումների ծաւալը, եւ ընկերութիւնն
աշխատում է վնասով: Շ.Շայդուլինը նաեւ տեղեկացրել է, որ կոնցեսիոն
պայմանագիրը իրենց հնարաւորութիւն է տալիս վարել ճկուն գնային
քաղաքականութիւն, բացառութեամբ ստրատեգիական նշանակութիւն
ունեցող բեռնափոխադրումների, որոնք կազմում են ընդհանուր
բեռնափոխադրումների ծաւալի 60 տոկոսը:
Միջխորհրդարանական յանձնաժողովի յաջորդ նիստը կանցկացուի
2010թ.-ի մարտին Մոսկուայում: