Հայաստանի 2010թ.-ի պետբիւջէի նախագծով քաղաքաշինութեան
ոլորտին նախատեսւում է յատկացնել 25,7 մլրդ դրամ
06-11-2009 18:36:00 | Հայաստան | Տնտեսութիւն
ԵՐԵՎԱՆ, 6 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Հայաստանի 2010թ.-ի
պետական բիւջէի նախագծով քաղաքաշինութեան ոլորտին նախատեսւում է
յատկացնել 25,7 մլրդ դրամ, ինչը շուրջ 600 մլն դրամով պակաս է
2009թ.-ի սպասողական ցուցանիշից: Այդ գումարները հիմնականում
ուղղուելու են կրթական եւ մշակոյթային օբյեկտների կառուցմանը,
հիմնանորոգմանը, բնակարանաշինությանը: Այս մասին ՀՀ Ազգային Ժողովի
մշտական յանձնաժողովների նոյեմբերի 6-ի համատեղ նիստում յայտնեց
ֆինանսների նախարարի առաջին տեղակալ Պաւել Սաֆարեանը:
Բիւջէտային միջոցներից, մասնաւորապէս, կրթական օբյեկտների
հիմնանորոգման համար նախատեսուել է 439,5 մլն դրամ, մշակոյթային
օբյեկտների հիմնանորոգման եւ բարելաւման ծրագրով` 695,5 մլն դրամ,
յուշարձանների վերականգնման համար` 213,3 մլն դրամ, բնակարանային
շինարարութեան ծրագրով` 22,05 մլրդ դրամ, զոհուած (մահացած) եւ
առաջին, երկրորդ եւ երրորդ կարգի հաշմանդամ զինծառայողների
անօթեւան ընտանիքներին բնակարանով ապահովման եւ բնակարանային
պայմանների բարելաւման համար` 500 մլն դրամ, վարչական օբյեկտների,
այդ թփում մարզպետարանների շէնքերի հիմնանորոգման համար` 83,5 մլն
դրամ, Սեւանայ լճի առափնեայ տարածքների ծրագրային փաստաթղթերի
մշակման համար` 10 մլն դրամ, նախնական մասնագիտական
(արհեստագործական) եւ միջին մասնագիտական ուսումնական
հաստատութիւնների հիմնանորոգման համար` 1,63 մլրդ դրամ:
Ըստ քաղաքաշինութեան նախարար Վարդան Վարդանեանի, ոլորտի
ծրագրերի համար նախատեսուած 25,7 մլրդ դրամի ընդհանուր գումարից
23,195 մլրդ դրամը յատկացուել է նախարարութեանը եւ, որպէս կապիտալ
ծախսեր, ներառուած է նախարարութեան 2010թ.-ի բիւջէում: Կառավարման
ապարատի պահպանման համար նախատեսուած է 473 մլն դրամ:
Նշուեց նաեւ, որ աղէտի գօտում անօթեւան մնացած ընտանիքներին
բնակարաններով ապահովելու նպատակով ՌԴ-ի վարկային միջոցների հաշուին
անշարժ գոյքի ձեռք բերման ծրագրով յատկացուած 22,05 մլրդ դրամի
չափով գումարների շրջանակներում նախատեսւում է, մասնաւորապէս,
Շիրակի մարզի Գիւմրի քաղաքում կառուցել 2 003 բնակարան, Ախուրեան
գիւղում` 182 բնակարան եւ մի շարք այլ գիւղական համայնքներում`
220 անհատական բնակարաններ: Լոռու մարզի Սպիտակ քաղաքում
նախատեսւում է կառուցել 354, իսկ գիւղական համայնքներում` 1 821
բնակարան:
Բիւջէի նախագծի հիմքում դրուած է 1 ԱՄՆ դոլարի դիմաց 376 ՀՀ
դրամ հաշուարկային փոխարժեքը: