2009թ.-ի 8 ամիսներին նախորդ տարուայ նոյն ժամանակահատուածի
համեմատ Երեւանում 59,9 տոկոսով աճել են հանցագործութեան դէպքերը
02-10-2009 16:26:00 | Հայաստան | Հասարակութիւն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: 2009թ.-ի առաջին 8 ամսուայ
ընթացքում Երեւանում գրանցուել է 4696 հանցագործութիւն, ինչ 1760
դէպքով կամ 59,9 տոկոսով աւելի է նախորդ տարուայ նոյն
ժամանակահատուածի ցուցանիշից: Այս մասին լրագրողների հետ հոկտեմբերի
2-ի հանդիպմանը յայտնեց ՀՀ Ոստիկանութեան Երեւանի վարչութեան պետ,
գեներալ-մայոր Ներսէս Նազարեանը:
Մայրաքաղաքում գրանցուած դէպքերը կազմել են հանրապետութիւնում
կատարուված հանցագործությունների 49,8 տոկոսը` նախորդ տարուայ 50,4-ի
դիմաց, իսկ յանցաւորութեան ինդեքսը իւրաքանչիւր 10 հազար բնակչի
հաշուարկով կազմել է 42,6` հանրապետական 29,3-ի դիմաց:
Հանցագործությունների աճը տեղի է ունեցել հիմնականում
սեփականութեան դէմ ուղղուած հանցագործությունների հաշուին, որոնց
թիւն աւելացել է 836-ով, այդ թւում` 674-ով աճել են անձնական
գոյքի գողութիւնները, 62-ով` բնակարանային գողութիւնները,
10-ով` կողոպուտները: Աճել են նաեւ անձի դէմ ուղղուած
յանցագործութիւնները` 423-ով կամ 126 տոկոսով, այդ թւում`
մարմնական վնասուածքներ հասցնելու դէպքերը` 159-ով: Երեւանի
համայնքներից հանցագործությունների թւով «աչքի է ընկել» Կենտրոնը,
որտեղ 550-ով աճել են հանցագործությունների դէպքերը` կողոպուտներ,
գողութիւններ, մարմնական վնասուածքներ հասցնելու դէպքեր: Կենտրոնից
շատ յետ չի մնում նաեւ Արաբկիրի համայնքը:
Ըստ Ն.Նազարեանի, 8 ամիսների ընթացքում յայտնաբերուած
թմրանյութերի ապօրինի շրջանառութեան դէպքերը աւելացել են 209-ով,
իսկ իրացման փաստերը` 108-ով: Մասնաւորապէս, թմրանիւթ պահելու եւ
իրացնելու կասկածանքով Երեւանի վարչութիւն են բերման ենթարկուել
Իրանի Իսլամական Հանրապետութեան քաղաքացիներ, որոնց բնակարանների
խուզարկութեամբ յայտնաբերուել են 302 գ ափիօն եւ 110 գ հաշիշ տեսակի
թմրամիջոցներ: Ն.Նազարեանը անհանգստացնող համարեց Երեւանի
գիշերային ակումբներում թմրամիջոցների տարածման փաստերը:
Ըստ նրա, 23-ով կամ 60,5 տոկոսով աճել է զէնք-զինամթերքի
առգրաւման փաստերով յարուցուած քրէական գործերի թիւը: Հրազենով
կատարուված հանցագործությունների թիւը աճել է 8-ով: Առգրաւուել կամ
յանձնուել է բնակչութեան մօտ ապօրինաբար պահւող 267 միաւոր հրազէն,
այդ թւում` 41 ինքնաձիգ, 54 հրացան, 136 ատրճանակ, 3 գնդացիր եւ
այլն:
243 դէպքով կամ 179 տոկոսով աճել են տնտեսական գործունէութեան
դէմ ուղղուած հանցագործությունների յայտնաբերման դէպքերը:
Վարոյթում գտնուող գործերով բացայայտումը աճել է ինչպէս բոլոր
հանցատեսակներով, այնպէս էլ հետախուզութեան գծով: Աճել են ինչպէս
ծանր, այնպէս էլ առանձնապէս ծանր հանցագործությունների բացայայտման
ցուցանիշները, կազմելով 60,6 եւ 67,3 տոկոս: Դիտաւորեալ
սպանութիւնների բացայայտումը աճել է 23,4 տոկոսով եւ կազմել 68,4
տոկոս` նախորդ տարուայ 8 ամիսների 45 տոկոսի դիմացղ
Երեւանում գրանցուել է աւազակութեան դէպքերի նուազում. 8
ամիսների ընթացքում բացայայտուել է 26 դէպք, չբացահայտուած է մնացել
32-ը, բացայայտման ցուցանիշը նուազել է եւ կազմել 44,8 տոկոս:
Առաւել հնչեղութիւն ստացած գործերից է յուլիսի 22-ին
«ՎՏԲ-Հայաստան» բանկի Արաբկիրի մասնաճիւղում Վրաստանի 3
քաղաքացիների կողմից կատարուված աւազակային յարձակումը, որը յաջորդ
օրն իսկ բացայայտուել է: Յետագայում տեղեկութիւններ են ստացուել, որ
նշուած հանցախմբի կողմից ՀՀ տարածքում կատարուել են նաեւ մի շարք
բնակարանային գողութիւններ: Եւս 13 հանցախմբեր կատարել են 56
կողոպուտներ, իսկ մէկ յանցաւոր խումբ` շուրջ 140 բնակարանային
գողութիւններ: Այդ յանցաւոր խմբերը ձերբակալուած են:
Հասարակական վայրերում կատարւող յանցագործութիւնները աճել են
23-ով, ոստիկանութեան բաժիններ բերման է ենթարկուել 1109 քաղաքացի,
որից 380-ը` հանցագործութեան կասկածանքով եւ 729-ը` վարչական
իրաւախախտումների համար:
2009թ.-ի առաջին 8 ամիսների տուեալներով, 48 դէպքով կամ 38,7
տոկոսով նուազել են անչափահասների կողմից կատարուված
յանցագործութիւնները, իսկ նախկինում դատուած անձանց կողմից
կատարուված յանցագործութիւնները աճել են 312-ով:
Նոյն ժամանակահատուածում յայտնաբերուել է հետախուզման մէջ
գտնուող 542 յանցագործ, կամ 77-ով աւելի նախորդ տարուայ նոյն
ժամանակահատուածի ցուցանիշից: