2009 թուականի յունուար-օգոստոսին Հայաստանի պետական բիւջէն
կատարուել է 79 մլրդ դրամ պակասուրդով
02-10-2009 15:38:00 | Հայաստան | Տնտեսութիւն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: 2009 թուականի
յունուար-օգոստոսին Հայաստանի պետական բիւջէն կատարուել է 79 մլրդ
դրամ պակասուրդով` իննամսյա ծրագրով նախատեսուած 72,6 մլրդ դրամի
փոխարէն: Նշենք, որ նախորդ տարուայ նոյն ժամանակահատուածում պետական
բիւջէն կատարուել էր շուրջ -14,2 մլրդ դրամ հավելուրդով:
Հաշուետու ժամանակահատուածում պակասուրդի ֆինանսաւորման ներքին
աղբիւրները կազմել են շուրջ -136,2 մլրդ դրամ` իննամսյա ծրագրով
նախատեսուած -80,8 մլրդ դրամի դիմաց: Ֆինանսաւորման ներքին
աղբիւրներում գանձապետական պարտատոմսերից զուտ մուտքերը կազմել են
շուրջ 23 մլրդ դրամ` իննամսյա ծրագրով նախատեսուածը գերազանցելով
35%-ով:
Յունուար-օգոստոսին շարունակուել է նաեւ ՀՀ ներքին շահող
փոխառության պարտատոմսերի հետգնման գործընթացը, որը կազմել է 0,7
մլն դրամ: Մուրհակների մարման նպատակով իննամսյա ծրագրով
նախատեսուած 61,9 մլն դրամի վճարումները կատարուել են 99,4%-ով`
կազմելով 61,5 մլն դրամ: 607,4 մլն դրամն ուղղուել է «ՎՏԲ-Հայաստան»
ՓԲԸ-ից ստացուած վարկի մարմանը:
Ըստ ՀՀ Ֆինանսների նախարարութեան Տեղեկատուութեան եւ
հասարակայնութեան հետ կապերի բաժնի հաղորդագրութեան, 2009 թուականի
յունուար-օգոստոս ամիսների ընթացքում պետական բիւջէի պակասուրդի
ներքին ֆինանսական ակտիւները կազմել են աւելի քան -158,5 մլրդ
դրամ` ապահովելով իննամսյա ծրագրի 163,4% կատարողական: