2009թ.-ի յունուար-օգոստոսին նախորդ տարուայ նոյն
ժամանակահատուածի համեմատ Հայաստանի պետական պարտքի սպասարկման
ծախսերն աճել են 11,6%-ով
02-10-2009 15:36:00 | Հայաստան | Տնտեսութիւն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: 2009թ.-ի
յունուար-օգոստոսին Հայաստանի պետբիւջէից աւելի քան 8,7 մլրդ դրամ
է յատկացուել պետական պարտքի սպասարկմանը` կազմելով իննամսյա ծրագրի
73.5%-ը: Նշուած գումարից 6,6 մլրդ դրամը տրամադրվել է ներքին, 2,1
մլրդ դրամը` արտաքին պարտքի սպասարկմանը: 2008թ.-ի նոյն
ժամանակահատուածի համեմատ պետական պարտքի սպասարկման ծախսերն աճել
են 11,6%-ով կամ 908,2 մլն դրամով, ինչը պայմանաւորուած է ներքին
պետական պարտքի սպասարկման ծախսերի աճով:
Ըստ ՀՀ Ֆինանսների նախարարութեան Տեղեկատուութեան եւ
հասարակայնութեան հետ կապերի բաժնի հաղորդագրութեան, պետական
բիւջէից տրամադրուած սուբսիդիաների գումարը կազմել է շուրջ 12,2
մլրդ դրամ, որն ապահովել է իննամսյա ծրագրի 81,2% կատարողական եւ
22,1%-ով զիջել նախորդ տարուայ նոյն ցուցանիշին:
Հաշուետու ժամանակահատուածում պետական բիւջէի ընթացիկ ծախսերի
11%-ը կամ աւելի քան 48,6 մլրդ դրամը կազմել են դրամաշնորհները,
որից աւելի քան 18,3 մլրդ դրամը տրամադրվել է համայնքների
բիւջէներին համահարթեցման սկզբունքով տրուող դոտացիաների
ֆինանսաւորմանը` 88,9%-ով ապահովելով իննամսյա ծրագրի կատարումը:
Դրամաշնորհների իննամսյա ծրագիրն ընդհանուր առմամբ կատարուել է
80,3%-ով:
Հաշուետու ժամանակահատուածում պետական բիւջէի ընթացիկ ծախսերի
35,5%-ն ուղղուել է սոցիալական նպաստներին եւ կենսաթոշակներին,
որոնք կազմել են աւելի քան 157,7 մլրդ դրամ կամ իննամսյա ծրագրի
86,9%-ը: Մասնաւորապէս` 116,9 մլրդ դրամ տրամադրվել է
կենսաթոշակներին, 40,8 մլրդ դրամ` նպաստներին: 2008 թուականի նոյն
ժամանակահատուածի համեմատ կենսաթոշակների գծով բիւջէի ծախսերն աճել
են 14%-ով, իսկ նպաստներինը` 26,2%-ով:
2009 թուականի յունուար-օգոստոս ամիսներին պետական բիւջէի ոչ
ֆինանսական ակտիւների հետ գործառնութիւնները կազմել են շուրջ 50,8
մլրդ դրամ կամ իննամսյա ծրագրի 63,9%-ը, որից աւելի քան 58,8 մլրդ
դրամ կազմել են ոչ ֆինանսական ակտիւների գծով ծախսերը եւ շուրջ 8,1
մլրդ դրամ` ոչ ֆինանսական ակտիւների օտարումից մուտքերը: 2008
թուականի նոյն ժամանակահատուածի համեմատ ոչ ֆինանսական ակտիւների
գծով ծախսերը նուազել են 15,2%-ով կամ 10,5 մլրդ դրամով, իսկ ոչ
ֆինանսական ակտիւների օտարումից մուտքերը` 20,4%-ով կամ շուրջ 2,1
մլրդ դրամով: