ԼԱՆԴՍԿՐՈՒՆԱ, 3 ՕԳՈՍՏՈՍԻ, ՆՈՅԵԱՆ ՏԱՊԱՆ: Օգոստոսի 2-ին
Շվեդիայի Լանդսկրունա քաղաքում աւարտուեց ծանրամարտի Եւրոպայի
երիտասարդական առաջնութիւնը:
Ծանր քաշային կարգում 3 ոսկէ մեդալ նուաճեց Հայաստանի
ներկայացուցիչ Ռուբէն Ալեքսանեանը (Արարատ): Նա պոկեց 175 կգ, հրեց
225 կգ եւ երկամարտում հաւաքեց 400 կգ: Երկրորդ տեղը գրաւեց Իրժի
Օրսագան (Չեխիա), ով հայ ծանրորդից յետ մնաց 14 կիլոգրամով. 386 կգ
(171 կգ + 215 կգ): Երրորդը Եուրի Տեգկաեւն էր (Ռուսաստան)` 376 կգ
(173 կգ + 203 կգ) արդիւնքով: Հայաստանը ներկայացրած միւս ծանր
քաշային Հայկ Յակոբեանը (Գիւմրի) 362 կգ (167 կգ + 195 կգ)
արդիւնքով եզրափակեց ուժեղագոյն վեցյակը:
Մեդալների հաշուարկով 4 ծանրորդներով համալրուած Հայաստանի
տղաների հաւաքականը գրաւեց 1-ին տեղը (6 ոսկէ, 2 արծաթէ եւ 1
բրոնզէ մեդալ), իսկ 2 աղջիկները իրենց հաշուին գրանցեցին 1 ոսկէ
մեդալ եւ թիմային պայքարում ճանաչուեցին 6-րդը: