Վիրահայ Գոհարը որոշել է իր վրացի ընկերներին բերել Հայաստան`
Արարատ լեռը տեսնելու
31-07-2009 19:50:00 | Հայաստան | Հասարակութիւն
ԵՐԵՎԱՆ, 31 ՅՈՒԼԻՍԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ: «Արի տուն»
ծրագրի մասնակիցներն արդէն վերադառնում են իրենց բնակութեան
երկրներ, սակայն Գոհարը որոշել է իր վրացի ընկերներին բերել եւ
անպայման ցոյց տալ Արարատ լեռը. «Դուք ամէն առաւօտ արթնանում եւ
տեսնում եք Արարատը, իսկ մեր մօտ չկայ: Պիտի ընկերներիս բերեմ եւ
ցոյց տամ, թէ ինչ հարստություն ունենք»,- յուզուած ասաց վրացահայ
Գոհար Թռչունեանը:
Թէեւ նա երկրորդ անգամն է Հայաստանում, սակայն նախորդ անգամ
եղել էր միայն Ջերմուկում: Այժմ երախտապարտ է ՀՀ Սփյուրքի
նախարարութեանը, որ հնարաւորութիւն ընձեռեց մասնակցելու նման
ծրագրի եւ հայրենիքն աւելի լաւ ճանաչելու:
Այստեղ նա չի հասցնում ձանձրանալ, օրերը շատ հետաքրքիր են
անցնում, նոր ընկերներ ունի... Սակայն Գոհարը դժգոհ էր
ինտերնետային կապից, ինչի դանդաղ աշխատանքը խոչընդոտում է
ընկերների հետ արագ շփմանը:
Նրա խօսքերով, Հայաստանում դրական առաջընթացներ կան, սակայն
դեռ շտկելու բաներ էլ կան. «Այստեղ քաղաքի կենտրոնն է միայն
գեղեցիկ, մաքուր, իսկ ծայրամասերն անտեսուած են, աղբամանները քիչ,
իսկ Վրաստանում այդպիսի տարբերութիւն չկայ»:
Նրան Հայաստանում ուղեկցում էր վրացի Լեւանի Ջոբավան: Վերջինս
հիացած էր Հայաստանով. «Էլի եմ գալու, այստեղ ամէն ինչ լաւ է:
Հիանալի բնութիւն ունեք, հայերդ էլ ջերմ եք, բարի... իսկ հայկական
տոլման շատ համեղ է»:
Մարինէ Յակոբեան