Հայաստանի անշարժ գոյքի շուկայում առաջիկայ ամիսներին
ակնկալւում է որոշակի ակտիւացում
15-05-2009 17:54:00 | Հայաստան | Տնտեսութիւն
ԵՐԵՎԱՆ, 15 ՄԱՅԻՍԻ, ՆՈՅԵԱՆ ՏԱՊԱՆ: Թէեւ համաշխարհային
ֆինանսա-տնտեսական ճգնաժամը իր բացասական ազդեցութիւնն ունեցաւ
Հայաստանի անշարժ գոյքի շուկայում, այդուհանդերձ առաջիկայ
ամիսներին ակնկալւում է որոշակի ակտիւացում: Ինչպէս մայիսի 15-ի
ասուլիսում յայտնեց ՀՀ Կադաստրի պետական կոմիտէի աշխատակազմի
ղեկավար Աշոտ Մուրադեանը, կոմիտէի անցկացրած
ուսումնասիրություններով աճի որոշակի միտումներ արդէն նկատւում են:
Այս տարուայ յունուար-մարտին հանրապետութիւնում իրականացուել է
անշարժ գոյքի հետ կապուած աւելի քան 28 հազար գործարք, ինչը նախորդ
տարուայ նոյն ժամանակահատուածի համեմատութեամբ շուրջ 18%-ով պակաս է:
Ապրիլին իրականացուել են 11,4 հազար գործարքներ, ինչը մարտի համեմատ
աւելի է 3,9%-ով: Նման աճի տեմպ է գրանցուել նաեւ մարտին` փետրուարի
նկատմամբ: Նշուեց նաեւ, որ նախորդ տարուայ նոյն ժամանակահատուածի
համեմատ 8%-ով աճել է անշարժ գոյքի վարձակալութեան գործարքների
թիւը: Ա.Մուրադեանի գնահատմամբ, եթէ աճի այս տեմպերը պահպանուեն,
ապա մինչեւ տարվերջ անշարժ գոյքի շուկան կկայունանայ: Ըստ նրա,
կառավարութեան հակաճգնաժամային ծրագրերը եւս կնպաստեն ոլորտի
ակիտվացմանը, եւ մօտ 1 ամսից աշխուժացումն արդէն նկատելի կլինի:
«Ակցեռն» գործակալութեան տնօրէն Յակոբ Բաղդասարեանի խօսքերով,
տնտեսական ճգնաժամը համարւում է ներդրումներ իրականացնելու
ամենայարմար ժամանակահատուածը: Ուսումնասիրությունները ցոյց են
տալիս, որ ճգնաժամի պայմաններում վերջին ամիսներին Հայաստանում
անշարժ գոյքի գործարքների մեծ մասը կնքել են գործարարները:
«Գալաքսիթի» գործակալութեան տնօրէն Դավիթ Հովհաննսիյանի
գնահատմամբ, նորակառոյց շէնքերի շուկայում վիճակը կայուն է, եւ
կարելի է ասել, որ ճգնաժամի հետեւանքով գներն այս շուկայում անկում
չեն ապրել: Ըստ նրա, դա պայմանաւորուած է նրանով, որ նորակառոյց
շուկայի գնորդների 50-60%-ը ԱՊՀ երկրներից է, հիմնականում
Ռուսաստանի հայ համայնքից, իսկ 20-25%-ը` սփյուռքահայերը: