Հայաստանի կառավարութիւնը հաստատեց շշալցուած հանքային ջրերին
ներկայացւող պահանջների վերաբերեալ տեխնիկական կանոնակարգը
30-04-2009 17:26:00 | Հայաստան | Տնտեսութիւն
ԵՐԵՎԱՆ, 30 ԱՊՐԻԼԻ, ՆՈՅԵԱՆ ՏԱՊԱՆ: Հայաստանի կառավարութեան
ապրիլի 30-ի նիստում հաստատուեց շշալցուած հանքային ջրերին
ներկայացւող պահանջների վերաբերեալ տեխնիկական կանոնակարգը: Ինչպէս
նշեց ՀՀ էկոնոմիկայի նախարար Ներսէս Երիցյանը, նախարարութիւնը
պէտք է առաջիկայ 6 ամսուայ ընթացքում իրականացնի
ուսումնասիրություններ եւ գործադիր մարմնին ներկայացնի տեղեկանք
սպառողական շուկայում այս կանոնակարգն ուժի մէջ մտնելու
ազդեցութեան վերաբերեալ:
Նախարարի խօսքերով, հանքային ջրերի տեխնիկական կանոնակարգով
կարգաւորւում են շշալցուած հանքային ջրերի արտադրութեան, մակնշման,
փաթեթավորման, պահման եւ փոխադրման գործընթացները: Ըստ Ն.Երիցյանի,
այդ փաստաթղթի ընդունման նպատակներն են` մարդկանց առողջութեան
անվտանգութեան ապահովումը եւ սպառողներին թյուրիմացության մէջ գցող
գործօնների կանխարգելումը, ինչպէս նաեւ կեղծուած հանքային ջրերի դէմ
պայքարի իրաւական բազայի ստեղծումը: Ն.Երիցյանը յայտնեց, որ
հանքային ջրերի շուկայում գլխաւոր խնդիրներից մէկն այն է, որ դրանց
մեծ մասը բնական հանքային ջրեր չեն, այլ մի քանի հանքային ջրերի ու
խմելու ջրի խառնուրդներ են: Կանոնակարգով յստակ տարբերակւում են
բնական հանքային, սեղանի եւ բուժիչ բնական հանքային ջրերը: