2008թ.-ին «ՎՏԲ-Հայաստան բանկ»-ի զուտ եկամուտը կազմել է 2,9
մլրդ դրամ` 2007թ.-ի 800 մլն դրամի դիմաց
29-04-2009 19:33:00 | Հայաստան | Տնտեսութիւն
ԵՐԵՎԱՆ, 29 ԱՊՐԻԼԻ, ՆՈՅԵԱՆ ՏԱՊԱՆ: 2008թ.-ին «ՎՏԲ-Հայաստան
բանկ»-ի զուտ եկամուտը կազմել է 2,9 մլրդ դրամ (մօտ 7 մլն 839 հազ.
ԱՄՆ դոլար)` 2007թ.-ի 800 մլն դրամ զուտ եկամտի դիմաց: Այս մասին
ապրիլի 29-ի ասուլիսում յայտնեց բանկի գլխաւոր տնօրէն-տնօրինության
նախագահ Վալերի Օվսյաննիկովը:
Նրա տուեալներով, 2008թ.-ի ընթացքում բանկի վարկային փաթեթի
ծաւալն աճել է 73%-ով եւ տարուայ վերջին կազմել 70,8 մլրդ դրամ,
յաճախորդներից ներգրաւուած միջոցների ծաւալը կազմել է 27,4 մլրդ
դրամ, ընդ որում, ժամկէտային աւանդների ծաւալը 2008թ.-ի ընթացքում
աճել է 33%-ով եւ կազմել 14,5 մլրդ դրամ: Նշուեց, որ «ՎՏԲ-Հայաստան
բանկ»-ի զուտ գործառնական եկամուտը 2008թ.-ի վերջին կազմել է 9,1
դրամ` տարուայ ընթացքում աճելով 78%-ով, իսկ կապիտալի եւ ակտիւների
շահութաբերութեան գործակիցները 2008թ.-ի արդիւնքներով կազմել են
համապատասխանաբար, 12,5% եւ 3%, 2007թ.-ի 9,2%-ի եւ 2,4%-ի դիմաց:
Նշուեց նաեւ, որ «ՎՏԲ-Հայաստան բանկ»-ի ակտիւները 2008թ.-ի
ընթացքում աճել են 43%-ով եւ տարուայ վերջին կազմել 99,2 մլրդ դրամ,
ընդհանուր պարտավորություններինը` 55%-ով եւ կազմել 75,3 մլրդ
դրամ:
Վ.Օվսյաննիկովը յայտնեց, որ Հայաստանի տնտեսական վիճակի
վատացման պատճառով շատ յաճախորդներ չեն ունեցել բանկի հանդէպ
պարտաւորութիւնները կատարելու հնարաւորութիւն, եւ «ՎՏԲ-Հայաստան
բանկ»-ը, ելնելով ապահովագրուած լինելու անհրաժեշտութիւնից,
մեծացրել է պահուստների ծաւալը, որը 2008թ.-ի վերջին կազմել է
վարկային պորտֆելի ծաւալի 2,1%-ը` 2007թ.-ի 1,1%-ի դիմաց:
Նրա խօսքերով, բանկի մասնաճիւղերի թիւը 2008թ.-ի վերջին
հասել է 78-ի, Երեւանում գտնուող 31 մասնաճիւղեր միացել են բանկի
«on-line» համակարգին: Այդ ժամկէտին «ՎՏԲ-Հայստան բանկ»-ի
իրաւաբանական անձ յաճախորդների թիւը հասել է 5 հազարի, իսկ
ֆիզիկական անձ հաճախորդներինը` 230 հազարի: