Երեւանի Կոնեակի գործարանի գլխաւոր տնօրէնի պաշտօնը յունվարի
1-ից ստանձնել է Արա Գրիգորեանը
22-01-2009 17:30:00 | Հայաստան | Տնտեսութիւն
ԵՐԵՎԱՆ, 23 ՅՈՒՆՎԱՐԻ, ՆՈՅԵԱՆ ՏԱՊԱՆ: Յունվարի 1-ից Երեւանի
Կոնեակի գործարանի (ԵԿԳ) գլխաւոր տնօրէնի պաշտօնը ստանձնել է Պեռնօ
Ռիկար Ուկրաինայի եւ Պեռնօ Ռիկար Մինսկի ներկայացուցչությունների
գործադիր տնօրէն Արա Գրիգորեանը: Ինչպէս յունվարի 22-ի ասուլիսում
յայտնեց Պեռնօ Ռիկար Արեւելյան Եւրոպայի գործադիր տնօրէն Էրիկ
Լաբորդը, գործարանի արդէն նախկին տնօրէն Սեդրիկ Ռետայոն, որը ԵԿԳ-ի
գործադիր տնօրէնի պաշտօնը զբաղեցրել է 2007թ.-ի յուլիսից մինչեւ
2009թ.-ի յունվարի 1-ը, կզբաղեցնի Պեռնօ Ռիկար Վենեսուելայի եւ
Հիւսիսային Կոնի գործադիր տնօրէնի պաշտօնը:
Է. Լաբորդի խօսքերով, Պեռնօ Ռիկարի համար «Արարատ»-ը
հանդիսանում է բացարձակ ռազմավարական ապրանքանիշ: Ըստ նրա,
ընկերութեան համար բիզնեսը զարգացնելու եւ ճիշտ կառավարելու համար
կարեւոր նշանակութիւն ունի նաեւ կադրերի ընտրութիւնը: «Այն
մարդիկ, որոնք ներկայացնում են մեր ներկայացուցչությունները`
հանդիսանում են Պեռնօ Ռիկարի դեսպաններ իրենց երկրներում: Եթէ
որեւէ մէկին նշանակում ենք գործադիր տնօրէն, ապա դա նշանակում է,
որ մենք նրա նկատամամբ ունենք 100 տոկոսանոց վստահութիւն»,-
ընդգծեց Է.Լաբորդը:
Ըստ նրա, Ա Գրիգորեանը բարձր որակավորմամբ մասնագէտ է, նրա
շնորհիւ Պեռնօ Ռիկարի Ուկրաինայի ներկայացուցչութիւնը վերջին 10
տարիների ընթացքում գրանցել է բարձր ցուցանիշներ եւ դարձել երկրում
ամենահաջողակ ընկերութիւններից մէկը: «Մենք վստահ ենք, որ նրա
ընտրութիւնը ամենաճիշտն էր, միւս կողմից ուրախ ենք, որ նրան հետ
վերադարձրեցինք հայրենիք»,- նշեց Է. Լաբորդը:
Նորանշանակ տնօրէնը յայտնեց, որ գործարանում կադրային
փոփոխութիւններ չեն իրականացուելու, քանի որ այստեղ աշխատում են
պրոֆեսիոնալներ: