Տնտեսական ազատութիւնների մակարդակով Հայաստանը 31-րդն է
աշխարհի 179 պետութիւնների թւում
13-01-2009 16:50:00 | Հայաստան | Տնտեսութիւն
ԵՐԵՎԱՆ, 13 ՅՈՒՆՎԱՐԻ, ՆՈՅԵԱՆ ՏԱՊԱՆ: Ամերիկեան «Heritage»
հիմնադրամի եւ «Wall Street Journal» պարբերականի անցկացրած
ամենամեայ հետազօտութեան արդիւնքներով, տնտեսական ազատութիւնների
մակարդակով Հայաստանն աշխարհի 179 պետութիւնների թւում 31-րդն է:
Ինչպէս հաղորդում է «Ազատութիւն» ռադիոկայանը, նախորդ տարուայ
համեմատութեամբ Հայաստանի ցուցանիշներում մեծ փոփոխութիւններ
չկան:
Հետազօտութեան հեղինակները բոլոր պետութիւնները գնահատում են
100 բալանոց սիստեմով` հաշուի առնելով 10 տարբեր ցուցանիշներ`
ներդրումներ կատարելու եւ բիզնես ծաւալելու ազատութիւնից մինչեւ
կոռուպցիայի մակարդակը տուեալ պետութիւնում:
Այս տարի Հայաստանը` 100 հնարաւորից ստացել է 69 միաւոր`
2008-ի 70-ի համեմատ: Այսպիսով, երկիրը կրկին յայտնուել է չափաւոր
ազատ տնտեսութիւն ունեցող պետութիւնների խմբում` գրաւելով
ամենաբարձր տեղը ԱՊՀ-ի երկրների շարքում: Վրաստանը, ըստ
հետազօտութեան արդիւնքների, տնտեսական ազատութիւնների մակարդակով
32-րդն է, Ադրբեջանը` 99-րդը, իսկ Ոուսաստանը ցուցակի ետնապահների
թւում է` զբաղեցնելով 146-րդ տեղը:
Ինչ վերաբերում է կոնկրետ ցուցանիշներին, ապա ամերիկացի
վերլուծաբանները բաւական բարձր են գնահատում Հայաստանում
ձեւաւորուած բիզնես միջավայրը` որպէս հիմք ընդունելով ինչպէս
պաշտօնական վիճակագրութեան տուեալները, այնպէս էլ ազգային
տնտեսութիւնը կարգաւորող օրենսդրական ակտերում տեղ գտած
դրոյթները: Եվ եթէ ներդումներ իրականանցնելու, հարկային
վարչարարության կամ աշխատուժի ազատ տեղաշարժն ապահովելու
կարողութիւններով Հայաստանը բաւական բարձր ցուցանիշներ է
արձանագրել, ապա մասնաւոր սեփականութեան իրաւունքի
անձեռմխելիությունն ու կոռուպցիայի ծաւալները, ըստ ամերիկացի
մասնագէտների, երկրի թոյլ կողմերն են: Այստեղ Հայաստանի
արձանագրած միավորները ցածր են` համապատասխանաբար 35 եւ 30:
Փոխարենը Հայաստանը` Վրաստանի եւ Լիտվայի հետ միասին,
մատնանշվում է որպէս ամենատպավորիչ տնտեսական ցուցանիշներ
արձանագրած պետություններց մէկն աշխարհում: «Վերջին 13 տարիներին
այս երեք երկրները տնտեսական ցուցանիշներով առաջ են անցել աշխարհի
պետութիւնների աւելի քան կէսից»,- գրում են զեկոյցի հեղինակները`
մանրամասնելով. «Մէկ շնչին բաժին ընկնող ՀՆԱ-ի ցուցանիշի միջին
աճը` 1996-ից 2008-ն ընկած ժամանակահատուածում Հայաստանում,
Վրաստանում եւ Լիտվայում` կազմել է 8 տոկոս»: