ՀԲ-Ի ԵՎ ԱՄՀ-Ի ՕԺԱՆԴԱԿՈՒԹՅՈՒՆՆ ԱՅՍՕՐ ՉԱՓԱԶԱՆՑ ԿԱՐԵՒՈՐ Է
ՀԱՅԱՍՏԱՆԻ ՀԱՄԱՐ,- ԱՍՈՒՄ Է ՀՀ ՎԱՐՉԱՊԵՏԸ
21-11-2008 20:58:00 | Հայաստան | Տնտեսութիւն
ԵՐԵՎԱՆ, 21 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Ընդունելով նոյեմբերի
21-ին Համաշխարհային բանկի հայաստանեան գրասենեակի ղեկավար
Արիստոմենե Վարուդակիսի նրա գլխաւորած պատուիրակութեանը, ՀՀ
վարչապետ Տիգրան Սարգսեանը նշել է, որ ՀԲ-ի պատուիրակութեան այցը
ճիշտ ժամանակին է, քանի որ միջազգային ֆինանսական կառոյցների`
ՀԲ-ի եւ ԱՄՀ-ի, օժանդակությունն այսօր չափազանց կարեւոր է
Հայաստանի համար: Նա ընդգծել է, որ այդ օժանդակության շնորհիւ
Հայաստանը մինչ այժմ կարողացել է դիմակայել համաշխարհային ճգնաժամի
առաջին ալիքին: Բայց նման աջակցութիւնը ներկայումս աւելի քան
հրատապ է, քանի որ, ըստ վարչապետի, արագ եւ համալիր
գործողութիւններ չիրականացնելու դէպքում, սպասւող արդէն տնտեսական
ճգնաժամի բացասական ազդեցութիւններին շատ աւելի դժուվար կլինի
դիմագրաւել: Մանաւանդ որ վերջին տարիներին Հայաստանի տնտեսութեան
մասշտաբները զգալիօրէն աճել են ու մեծ ռեսուրսներ են պահանջում:
ՀՀ վարչապետը նշել է, որ Վաշինգտոնում վերջերս ձեռք բերուած
պայմանավորվածությունների շրջանակում, ՀԲ-ի կողմից խօստացուած
ֆինանսական աջակցութիւնը, համագործակցութեան ծրագրի
շրջանակներում, կուղղուի մեր երկրի տնտեսութեան ռազմավարական երեք
ուղղութիւնների` էներգետիկ համակարգի, խմելու եւ ոռոգման ջրի,
ճանապարհային շինարարութեան ոլորտներում հիմնարար ծրագրերի, ինչպէս
նաեւ աւելի փոքր ֆինանսական միջոցներ պահանջող` կրթութեան,
կառավարման համակարգի, գիւղատնտեսութեան, սոցիալական ներդրումների
ոլորտներում ծրագրերի իրականացմանը: Ակնկալուող եւս 250 մլն ԱՄՆ
դոլարի լրացուցիչ օժանդակությունը կտրամադրուի փոքր եւ միջին
ձեռնարկատիրութեան խթանմանը: