ՀԱՅԱՍՏԱՆԸ 2009 Թ.-ԻՆ ԿԲԱՐԵԼԱՒԻ ԻՐ ՑՈՒՑԱՆԻՇԸ ՄՐՑՈՒՆԱԿՈՒԹԵԱՆ
ՀԱՄԱՇԽԱՐՀԱՅԻՆ ԶԵԿՈՅՑՈՒՄ,- ՀԱՄՈԶՈՒԱԾ Է ՀԳՀՄ-Ի ՆԱԽԱԳԱՀԸ
11-11-2008 20:32:00 | Հայաստան | Տնտեսութիւն
ԵՐԵՎԱՆ, 11 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Այն հանգամանքը, որ
Համաշխարհային տնտեսական ֆորումի 2008թ.-ի Մրցունակութեան
համաշխարհային զեկոյցի (ՄՀԶ) համաձայն, Հայաստանն մրցունակութեան
համաթվով զբաղեցրել է 97-րդ տեղը աշխարհի 134 երկրների շարքում`
նախորդ տարուայ 93-րդի փոխարէն, պայմանաւորուած է նաեւ այն բանով, որ
ՄՀԶ-ի ցուցանիշները արտացոլել են Հայաստանում դեռեւս օրենսդրական
լուծում չստացած հարցեր: Այս մասին նոյեմբերի 11-ի ասուլիսում
յայտնեց Հայաստանի Գործատուների (արդիւնաբերողների եւ
գործարարների) հանրապետական միութեան նախագահ Արսէն Ղազարեանը:
Նրա խօսքերով, ՀՀ Ազգային Ժողով են ներկայացուել օրենսդրական
մի քանի փաթեթների նախագծեր, որոնց ընդունումով կը բարելաւուեն
բիզնեսի վարման պայմանները: Նախատեսւում է, որ մինչեւ 2008թ.-ի
վերջը փոփոխութիւններ եւ լրացումներ կկատարուեն ՀՀ Աշխատանքային
օրէնսգրքում, ինչն էապէս կազդի ՄՀԶ-ի Հայաստանի համաթվի վրայ:
Ա.Ղազարեանի գնահատմամբ, ներկայումս աշխատանքային վէճերի լուծմանն
առնչուող օրենդրությունը չի համապատասխանում միջազգային
չափանիշներին եւ ազատական շուկայի սկզբունքներին: Իսկ, օրինակ,
Ադրբեջանը 2008թ.-ի սկզբին նոր Աշխատանքային օրէնսգրքի ընդունման
շնորհիւ բարելաւել է իր համաթիւը ՄՀԶ-ի զեկոյցում:
ՀԳՀՄ-ի նախագահը համոզմունք յայտնեց, որ Համաշխարհային բանկի
եւ Արժոյթի միջազգային հիմնադրամի փորձագետները 2008թ.-ի
արդիւնքներով առաջընթաց կարձանագրեն երկրում տնտեսական
մրցակցութեան պաշտպանութեան, կոռուպցիայի դէմ պայքարի ոլորտներում,
եւ Հայաստանը ՄԶՀ-ի 2009թ.-ի զեկոյցում կունենայ առնուազն 2007թ.-ի
զեկոյցի համաթվի ցուցանիշը (93-րդ տեղ):