ԹԵԼ ԱՒԻՒ, 10 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Պաղեստինեան
արմատական ՀԱՄԱՍ շարժումը բաց նամակ է յղել ԱՄՆ-ի պետքարտուղար
Կոնդոլիզա Ռայսին` երկխօսութեան կոչ անելով: Այն ստորագրել է
շարժման պաշտօնական ներկայացուցիչ Ահմեդ Յուսեֆը: Ինչպէս յայտնել է
«Ջերուզալեմ պոստ» թերթը, Յուսեֆը ուղերձի բովանդակութիւնը
«մանրամասներով» համաձայնեցրել է ՀԱՄԱՍ-ի ղեկավարների հետ:
Նամակում ասւում է, որ ԱՄՆ-ի պետդեպարտամենտին «հարկ էր նոր
լուծումներ փնտրել, փոխանակ հին կարծրատիպներից կառչելու»: Յուսեֆը
նշել է նաեւ, որ նոյնիսկ Արեւմուտքում ձայներ են հնչում ՀԱՄԱՍ-ի
նկատմամբ Վաշինգտոնի անհեռատես քաղաքականութեան մասին: Ընդ որում
նա ընդգծել է. «Մենք ձեզնից չենք խնդրում ճանաչում: Մենք
օրինականորեն յաղթել ենք գրաւեալ տարածքների ընտրութիւններում:
Անգամ արդարութեան սեփական զգացումից ելնելով դուք պարտաւոր եք
հաշուի նստել հակամարտութեան բոլոր կողմերի հետ»: Պաղեստինեան
ժողովուրդը, նախ եւ առաջ Գազայի հատուածի 1,3 մլն բնակիչները,
ընդգծել է Յուսեֆը, «պատժվեց միայն նրա համար, որ անցկացրեց ազնիւ
եւ արդար ընտրութիւններ եւ կողմ քուէարկեց ՀԱՄԱՍ-ին»: