ՍՈՒԴԱՆՈՒՄ ԲՐԻՏԱՆԻԱՑԻ ՈՒՍՈՒՑՉՈՒՀԻՆ ՁԵՐԲԱԿԱԼՈՒԵԼ Է «ԻՍԼԱՄԻՆ
ՎԻՐԱՒՈՐԱՆՔ ՀԱՍՑՆԵԼՈՒ ՀԱՄԱՐ»
27-11-2007 16:55:00 | | Միջազգային
ԽԱՐՏՈՒՄ, 27 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Սուդանում «Մուհամմեդ
մարգարեին վիրաւորելու համար» ձերբակալուել է Մեծ Բրիտանիայի
հպատակ, 54-ամեայ ուսուցչուհի Ջիլիան Գիբբոնսը:
Ըստ տեղեկութիւնների, Խարտումի դպրոցներից մէկի անգլերէնի
ուսուցչուհին ձերբակալուել է երկրի կրթութեան նախարարութեանը
ներկայացուած տարրական դասարանների աշակերտների ծնողների բողոքի
առնչութեամբ: Նրանք Ջիլիան Գիբբոնսին մեղադրել են «Մուհամմեդ
մարգարեին ծաղրելու» մէջ:
Գիբբոնսի «մեղքն» այն է, որ դպրոցական ծրագրի շրջանակում, որը
ներառում է խաղի տարրեր, նա երկրորդ դասարանի աշակերտներին
առաջարկել է անուն մտածել փափուկ խաղալիքի համար: Աշակերտների մեծ
մասը կողմ է եղել, որպէսզի աղջիկներից մէկի դասարան բերած արջուկին
տան «Մուհամմեդ» անունը:
Սուդանյան օրէնքների համաձայն, որ հիմնուած են շարիաթի վրայ,
Գիբբոնսի «մեղքն» ապացուցվելու դէպքում, նա կարող է դատապարտուել
մտրակի 40 հարուածի: