Սեպտեմբերի 26-ին Բելգիայի Թագաւորութիւնում Հայաստանի դեսպանութիւնը, Եմ-ում եւ Նատօ-ում ՀՀ առաքելութիւնները Բրիւսէլի ամենահեղինակաւոր Պալէ Դէ Բոզառ գեղարուեստի պալատում կազմակերպել էին համերգ-ընդունելութիւն Հայաստանի Պետական երիտասար¬դական նուագախմբի եւ հանրաճանաչ ջութակահարներ Սերգեյ Խաչատրեանի եւ Կարէն Յարութիւնեանի մասնակցութեամբ` նուիրուած Հայաստանի Հանրապետութեան անկախութեան 20-ամեայ տարեդարձին: Ինչպէս տեղեկացնում են ՀՀ ԱԳՆ մամուլի, տեղեկատուութեան եւ հասարակայնութեան հետ կապի վարչութիւնից, համերգից առաջ բացման խօսքով հանդէս եկաւ Բելգիայի Թագաւորութիւնում ՀՀ դեսպան Աւետ Ադոնցը: Դեսպանը, շնորհակալութիւն յայտնելով ներկաներին Հայաստանի անկախութեան 20-ամեակին նուիրուած համերգին մասնակցելու համար, ընդգծեց Հայաստանի կայացման գործում ժողովրդավարական եւ եւրոպական արժէքների անշրջելիու¬թիւնը, ինչպէս նաեւ կարեւորեց համագործակցութեան շարունակականութիւնը Բելգիայի, ԵՄ կառոյցների եւ Նատօ-ի հետ: համերգին յաջորդեց անկախութեան տարելիցին նուիրուած հանդիսաւոր ընդունելութիւն, որին ներկայ էին Բելգիայի օրէնսդիր եւ գործադիր իշխանութեան բարձրաստիճան ներկայացուցիչներ, Բելգիայում, ԵՄ կառոյցներում, Նատօ-ում հաւատարմագրուած դեսպաններ ու դիւանագէտներ, պատգամաւորներ, Բելգիայի քաղաքական եւ հասարակական շրջանակների ականաւոր գործիչներ, մտաւորականներ, գործարարներ, լրագրողներ եւ հայ համայնքի ներկայացուցիչներ:

---