Սեպտեմբերի 28-ին ԳԱԼԱՅ հեռուստաընկերութեան «Գալայ news հաւելուած» հաղորդման հիւր, Շուէդիայի թագաւորական տեխնոլոգիական ինստիտուտի պրոֆէսոր, շուէդաբնակ Արամայիս Միրզախանեանը արտերկրում բնակուող հայութեանը վերաբերող բազմաթիւ հարցերին ի պատասխան անդրադրձել է նաեւ սփիւռքահայերին ՀՀ քաղաքացիութիւն շնորհելու խնդրին:
Ստորեւ ներկայացւում է Արամայիս Միրզախանեանի խօսքի այդ խնդրին վերաբերուող հատուածը, որը «ՆՏ» -ին է տրամադրել «Ժիրայր Սեֆիլեանի քաղաքացիութեան իրաւունքի պաշտպանութեան կոմիտէ» -ն:
«... կայ խտրականութիւն սփիւռքահայութեան նկատմամբ: Կան սփիւռքահայեր, որոնք գտնւում են Հայաստանում եւ ցանկանում են ստանալ ՀՀ քաղաքացիութիւն, բայց չեն ստանում: Ես պէտք է ճշգրիտ անուններով նշեմ. դա Ժիրայր Սեֆիլեանն է, Շուշիի առանձնակի գումարտակի նախկին հրամանատարը եւ Սարգիս Հացպանեանը, ով Ղարաբաղում մարտնչած եւ հսկայական օգնութիւն կատարած անձնաւորութիւն է, ֆրանսահայ: Ես այդ մարդու հետ տասնեակ անգամներ եղել եմ Ղարաբաղում: Այս երկու անձնաւորութիւնները բանտարկուել են` Ժ.Սեֆիլեանը 1.5 տարի, Ս.Հացպանեանը` 2.5 տարի, եւ երկուսն էլ ազատ են արձակուել, այսինքն եթէ անգամ նրանք ունեցել են ինչ–որ մեղք, յանցանք, այն արդէն աւարտուած է եւ այս մարդիկ այսօր ապրում են Երեւանում, բայց նրանց մերժւում է տալ ՀՀ քաղաքացիութիւն: Սա ի՞նչ խտրականութիւն է: Դա ինչ-որ մէկի քմահաճոյքն է: Ես որպէս սփիւռքահայ բողոքում եմ եւ պահանջում, որպէսզի այս մարդկանց տրուի ՀՀ քաղաքացիութիւն: Աւելացնեմ նաեւ, որ եթե այդ երկու անձնաւորութիւններին մօտակայ ապագայում չտրուի ՀՀ քաղաքացիութիւն, ապա ես իմ բողոքը կ'արտայայտեմ նրանով, որ Լեռնային Ղարաբաղի Հանրապետութեան «Մայրական երախտագիտութիւն Արցախի քաջորդիներինէ ստացած մեդալը կը վերադարձնեմ ԼՂՀ Նախագահին, որի ձեռքից ի դէպ ստացել եմ այն»: