«Դուք գիտէք, որ էս հզօր պատասխան տուող եմ, սակայն բանէր կան, որոնց չի կարելի անդրադառնալ: Եթէ անձի մօտ կենտրոնացուած կարծր գաղափարախօսութիւն է դարձել, դրա պատասխան տալը կամ չտալը միեւնոյն արժէքն է ստանում»,- հոկտեմբերի 7-ի ճեպազրոյցում այսպէս արձագանքեց Ազգային ժողովի ՀՀԿ խմբակցութեան ղեկավար Գալուստ Սահակեանը ՀՀ առաջին նախագահ, Հայ ազգային կոնգրէսի առաջնորդ Լեւոն Տէր-Պետրոսեանի նախօրէի ելոյթին: Մասնաւորպէս, ՀԱԿ առաջնորդը քննադատել էր ՀՀԿ-ի քաղաքականութիւնը եւ ցեղակրօնութեան վրայ հիմնուած գաղափարախօսութիւնը: Ըստ Գ.Սահակեանի, ցեղակրօնութիւնը ազգի կարեւորագոյն խնդիրները լուծող գաղափարախօսութիւն է, իսկ Լ.Տէր-Պետրոսեանի կարծիքը, թէ դա ֆաշիստական գաղափարախօսութիւն է, Հանրապետական կուսակցութեան համար ընդունելի չէ: «Նժգեհի գաղափարախօսութիւնը մեր հայոց գաղափարախօսութեան արձանագրումն է ընդամէնը»,-ընդգծեց պատգամաւորը: «Միտինգ էն արել, որ հայհոյեն մեզ: Մենք էլ ինչ-որ պէտք է` պատասխանել ենք: Չեմ կարծում, որ անընդհատ պիտի պատասխանենք ու պատասխանենք»,-ասաց Գ.Սահակեանը: ՀՀԿ-ի պատասխանը վերահաստատելու մասին «ՆՏ»-ի թղթակցի խնդրանքին ի պատասխան պատգամաւորը յայտարարեց. «Սովորաբար գրողն էլ, որ բանաստեղծութիւն է գրում, իր բանաստեղծութիւնը նորից նոյնութեամբ չի կարող վերարտադրել»` խորհուրդ տալով կարդալ «նախորդ շրջանի թերթերը»: ՀՀԿ խմբակցութեան ղեկավարը լրագրողներին խորհուրդ տուեց չընկնել միտինգների յետեւից. «Ախր, աւելի լաւ բանէր կան, որ երկրում տեղի էն ունեցել: Ընկել էք միտինգի յետեւից, մոռացել էք, որ անկախութեան 20-ամեակ ենք արել, որ միջազգային արենայում բաւականին բարձր դիրքորոշումների խնդիր է առաջացել, այսօր Ֆրանսիայի նախագահը մեզ մօտ է»:

---