12-10-2011 11:45:15 | Հայաստան | Մամլո հաղորդագրություն
Հոկտեմբերի 12-ին, Երեւանում տեղի ունեցաւ Հհ-ում ԵՄ աջակցութեամբ մաքսային ոլորտում իրականացուող բարեփոխումների առաջընթացի վերաբերեալ աշխատաժողով: Այն կազմակերպուել էր Եւրոպական կառոյցների հետ ՀՀ պետական մարմինների համագործակցութիւնը համակարգող միջգերատեսչական յանձնաժողովի, Հայաստանում ԵՄ պատուիրակութեան եւ Հհ-ում ԵՄ Խորհրդատուական խմբի (ԵՄ ԽԽ) համատեղ ջանքերով:
Աշխատաժողովի նպատակն էր քննարկել ՀՀ մաքսային ծառայութեան բարեփոխումներին առնչուող խնդիրներ եւ մասնակիցներին ու պաշտօնատար անձանց ներգրաւել առեւտրի խթանման հարցերի, այդ թւում` մաքսային բացթողման գործընթացի ու ընթացակարգերի պարզեցման հնարաւորութիւնների վերաբերեալ քննարկման մէջ:
Կոնկրէտ բարեփոխումների իրականացումը Խորը եւ համապարփակ ազատ առեւտրի համաձայնագրի (ԽՀԱԱՀ) շուրջ բանակցութիւնների մեկնարկի կենսական նախապայման է: Բարեփոխումները հրատապ են նաեւ առեւտրի հեշտացման տեսանկիւնից, ինչը կարեւոր նախադրեալ է դէպի Հայաստան ներդրումների հոսքը խրախուսելու համար:
Աշխատաժողովի յատուկ նպատակներն էին`
• Թուարկել Հայաստանի մաքսային ծառայութեան` բարեփոխումների իրականացման հետ կապուած խնդիրները եւ մարտահրաւէրները,
• Տրամադրել այլ երկրներում մաքսային ծառայութեան բարեփոխումների շրջանակում ԵՄ չափանիշների կիրառման օրինակներ,
• Ներկայացնել մաքսային հարցերով զբաղուող նորաստեղծ աշխատանքային խմբի դերը,
• Ընդգծել այն նախապայմանները, որոնք պէտք է բաւարարուեն Խհաահ-ի շուրջ բանակցային գործընթացը մեկնարկելու համար,
• Ներկայացնել Հայաստանի մաքսային ծառայութեան բարեփոխումների ճանապարհին արձանագրուած առաջընթացը եւ առաջարկներ յետագայ քայլերի վերաբերեալ,
• Քննարկել մաքսային քաղաքականութեան մշակումը:
Բացման խօսքով հանդէս եկան Հայաստանում ԵՄ պատուիրակութեան ղեկավար, դեսպան Ռաուլ դը Լուցենբերգերը, Ազգային անվտանգութեան խորհրդի քարտուղար Արթուր Բաղդասարեանը եւ Պետական եկամուտների կոմիտէի նախագահ Գագիկ Խաչատրեանը: ԵՄ ԽԽ մաքսային հարցերով խորհրդատուն հանդէս եկաւ հիմնական զեկոյցով: Զեկոյց ներկայացրեց նաեւ Պեկ-ի ներկայացուցիչը: