Հայաստանի պետական կամերային նվագախումբը հանդես կգա Հայկ Դավթյանի ղեկավարությամբ
04-03-2022 19:00:00 | Հայաստան | Համերգ
Մարտի 4-ին, ժամը 19:00 Կոմիտասի անվան կամերային երաժշտության տանը կկայանա համերգ, որի ընթացքում Հայաստանի պետական կամերային նվագախումբը (գեղարվեստական ղեկավար և գլխավոր դիրիժոր՝ Վահան Մարտիրոսյան) հանդես կգա դիրիժոր Հայկ Դավթյանի ղեկավարությամբ:
Համերգային ծրագրում Գրիգի, Բրիտենի, Շոստակովիչի, Սիբելիուսի, Միրզոյանի ստեղծագործություններն են։
Նշենք, որ Հայկ Դավթյանը հայ ջութակահարների լավագույն ավանդույթների կրողն է, բազմաթիվ մրցույթների դափնեկիր է: Հանդես է գալիս որպես դիրիժոր և ջութակահար։ Համերգներով հանդես է եկել տարբեր երկրներում՝ Ֆրանսիա, Կանադա, Իտալիա, Իսպանիա, Միացյալ Արաբական Էմիրություններ, Քաթար, Իսրայել և այլն։ Պարբերաբար համագործակցել է Փարիզի օպերայի, Փարիզի ռադիոյի, Ֆրանսիայի ռադիոյի ֆիլհարմոնիկ և այլ նվագախբերի հետ:
1999-2011թթ. ստեղծել և ղեկավարել է Փարիզի Լիրիկական սինֆոնիկ ու այնուհետև Նաիրի լարային նվագախմբերը։ Համերգների ընթացքում մշտապես ներկայացրել է հայկական երաժշտության լավագույն կոթողները։ Դասավանդել է Ստրասբուրգի բարձրագույն ակադեմիայում (Academié Supérieur de Strasbourg), Փարիզի բարձրագույն կոնսերվատորիայում և այլուր։
Ներկայումս Հայկ Դավթյանը Փարիզի շրջանի Սերժի-Պոնտուազի տարածաշրջանային բարձրագույն կոնսերվատորիայում դասավանդում է ջութակ ու կամերային երաժշտություն: Պարբերաբար հրավերներ է ստանում հայաստանյան նվագախմբերի կողմից՝ հանդես գալու որպես մենակատար ջութակահար և դիրիժոր ու շարունակում է ներկայացնել Հայաստանում ֆրանսիական ու համաշխարային երաժշտության չբացահայտված էջերը:
Հարցերի դեպքում կարող եք կապ հաստատել Կամերային երաժշտության ազգային կենտրոնի PR պատասխանատու Ռոզա Գրիգորյանի հետ 077 30 34 84
ՀԱՅԵՐԵՆ
Русский
English
Դաս. հայերեն
French
