Իշխանությունները ստիպում են Քաջարանի գյուղապետին ստորագրել Քաջարանի հողերից Զանգեզուրի պղնձամոլիբդենային կոմիբինատին հանձնելու համաձայնագրի տակ
15-12-2011 15:00:51 | Հայաստան | Տնտեսություն
Դեկտեմբերի 14-ին «Էկոլուրը» հաղորդագրություն էր տարածել, որ Սյունիքի մարզի Քաջարան գյուղի գյուղապետ Ռաֆիկ Աթայանին տարել են ոստիկանություն, որտեղ նա մնացել է մի քանի ժամ եւ երեկոյան ազատ արձակվել:
Դեկտեմբերի 15-ին Ռաֆիկ Աթայանը www.hra.am –ին հայտնեց, որ ինքը ոչ թե ոստիկանությունում է եղել, այլ` մարզպետարանում: «Ինձ կանչել էին մարզպետարան, բոլոր կողմերից իշխանությունները շատ խիստ ձեւով ճնշումներ էին գործադրում, որպեսզի ես ստորագրեմ պայմանագիրը: Ասում էին` պայմանագիրը պիտի պարտադիր ստորագրվի: Ես էլ պայմանագիրը չեմ ստորագրել, ոչ էլ կյանքում կստորագրեի: Գրել եմ իմ հարաժարականը գյուղապետի պաշտոնից, այսօր էլ կգնամ «Հանրապետական» կուսակցությունից հրաժարական կգրեմ»,- հեռախոսով մեզ հաղորդեց Աթայանը:
Նա անուններ չնշեց, միայն ասաց, որ ճնշում գործադրողները «իշխանություններից էին»:
Ռաֆիկ Աթայանը եւս մեկ անգամ հայտարարեց, որ ինքը չի հրաժարվելու Քաջարանի համար պայքարից: «Ես, որպես գյուղացի, իմ դիրքորոշումն ունեմ` բոլորի հետ միասին պաշտպան կանգնել գյուղին, իմ գերեզմաններին, իմ հայրենիքին, իմ հողին: Պատրաստ եմ մինչեւ վերջ արյուն թափել»,- www.hra.am –ին ասաց Քաջարանի գյուղապետը:
Հիշեցնենք, որ քաջարանցիները պայքար են սկսել ընդդեմ ՀՀ Կառավարության 2011թ. ապրիլի 28-ի թիվ 627-Ն որոշման, որով Սյունիքի մարզի վարչական սահմաններում, այդ թվում՝ Քաջարանում, գյուղատնտեսական նշանակության հողերից 181,7 հա տարածք ճանաչվել է բացառիկ՝ հանրային գերակա շահ:
Քաջարանցիները ահազանգում են, որ տարբեր սպառնալիքներով եւ ճնշման մեթոդներով իշխանությունները ուզում են ստիպել գյուղապետին ստորագրել Քաջարանի հողերից 27 հա Զանգեզուրի պղնձամոլիբդենային կոմիբինատին հանձնելու համաձայնագրի տակ:
Գյուղապետը հրաժարվում է ստորագրել` հայտարարելով, որ դա կդառնա ամբողջ գյուղի հարկադիր տարհանման պատճառ:
Silva Adamyan
Central Asia and Caucasus NGO Forum on ADB
Work group coordinator in Armenia
Member of coordination group "Environmental public alliance"