ՍՏԵՓԱՆԱԿԵՐՏ, 8 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Լեռնային Ղարաբաղի հանրապետության նախագահ Բակո Սահակյանը դեկտեմբերի 7-ին ընդունել է աշխատանքային այցով Արցախում գտնվող Հայաստանի Քաղաքացիական ավիացիայի գլխավոր վարչության պատվիրակությանը` կառույցի ղեկավար Արտյոմ Մովսեսյանի գլխավորությամբ: Հանդիպման ընթացքում քննարկվել են Ստեփանակերտի օդանավակայանի վերագործարկման հետ կապված հարցեր: Իրականացվող աշխատանքների ընթացքի մասին տեղեկություններ է հաղորդել ԼՂՀ Քաղաքացիական ավիացիայի վարչության պետ Դմիտրի Աթբաշյանը: Իրենց նկատառումներն են հայտնել նաեւ Ա.Մովսեսյանը եւ ՀՀ քաղաքացիական ավիացիայի մասնագետները: Ինչպես «ՆՏ»-ին հայտնեցին ԼՂՀ նախագահի աշխատակազմի Տեղեկատվության գլխավոր վարչությունից Բ.Բահակյանը գոհունակություն է հայտնել իրականացվող աշխատանքների տեմպերի կապակցությամբ` ընդգծելով միաժամանակ, որ անհրաժեշտ է ակտիվացնել աշխատանքները որակյալ կադրերի եւ մասնագետների պատրաստման ուղղությամբ: Հանդիպմանը մասնակցում էին ԼՂՀ վարչապետ Արա Հարությունյանը, պաշտոնատար այլ անձինք:

---