Լոռու մարզում առկա է վթարային շինությունների փլուզման վտանգը
27-03-2012 11:34:10 | | Մամլո հաղորդագրություն
Մարտի 26-ի, ժամը՝ 12.00-ին Լոռու մարզի Թումանյանի քաղաքապետ Լ. Զավալյանից գրություն է ստացվել, որ նույն քաղաքի 3-րդ փողոցի թիվ 9 շենքը վթարային է, եւ վտանգ է սպառնում բնակիչներին:
Նույն օրը, ժամը 14.00-ին Չկալովի գյուղապետ Ռ. Շաքարյանից տեղեկություն է ստացվել, որ սողանքի հետեւանքով փլուզվել է գյուղի 2-րդ փողոցի թիվ 31 տունը:
Ստեղծված իրավիճակը պարզելու նպատակով Չկալով գյուղ, այնուհետեւ` Թումանյան քաղաք է մեկնել Լոռու մարզային փրկարարական վարչության օպերատիվ խումբը:
Պարզվել է, որ 1961թ. կառուցված շինությունների (երկհարկանի` Չկալով գյուղում, մեկհարկանի` Թումանյան քաղաքում) հիմնապատերին ճեղքեր են առաջացել են դեռեւս 1988թ. երկրաշարժից հետո: Շինությունների շահագործման տարիների ընթացքում ճեղքերն աստիճանաբար լայնացել են, եւ ներկայումս առկա է շինությունների փլուզման վտանգ: Չկալով գյուղի նշված տանը բնակվում է 5 անձից բաղկացած ընտանիք, իսկ Թումանյան քաղաքի վթարային շենքում` 2 ընտանիք (7 մարդ):
Քաղաքապետ Լ. Զավալյանին եւ գյուղապետ Ռ. Շաքարյանին առաջարկվել է վերաբնակեցնել ընտանիքները:
Ստեղծված իրավիճակի մասին տեղյակ է պահվել Լոռու մարզպետ Ա. Նալբանդյանը, ում հանձնարարությամբ կստեղծվի հանձնաժողով` տվյալ շինությունների վթարայնության աստիճանները որոշելու եւ խնդրին լուծում տալու համար: