Րաֆֆի Հովհաննիսյանի շտաբից «Նոյյան Տապան»-ը ստացել է մամլո հաղորդագրություն, որը ստորև ներկայացնում ենք ամբողջությամբ.
27 փետրվարի 2013թ., Երեւան: Այսօր ՀՀ նախագահի հաղթանակած թեկնածու Րաֆֆի Կ. Հովհաննիսյանը եւ նրա թիմակիցները շարունակեցին համակիրների հետ հանդիպումները Սյունիքի մարզի քաղաքներում:
Այցերը մեկնարկեցին Ագարակից, շարունակվեցին Մեղրիում, որտեղ Հովհաննիսյանը հանդիպեց քաղաքապետին եւ հայտնեց իր դժգոհությունը փետրվարի 18-ի ընտրությունների արդյունքների, տեղ գտած ընտրախախտումների վերաբերյալ: Հովհաննիսյանը նաեւ հիշեցրեց քաղաքապետին, թե «Ժառանգությունը» խորհրդարանում Մեղրիի եւ Սյունիքի խնդիրներով որքան օրենսդրական նախաձեռնություններ է շրջանառության մեջ դրել, որոնց ընդդիմացել են ՀՀԿ-ական պատգամավորները:
Քաջարանում պղնձամոլիբդենային գործարանի տնօրինությունը պարապուրդի մեջ գտնվող աշխատակիցներին ժողովի էր հրավիրել, որպեսզի խոչընդոտի Հովհաննիսյանի հետ հանդիպմանը: Այդուհանդերձ իրեն ողջունելու եկած քաջարանցիներին Հովհանննիսյանը շնորհակալություն է հայտնել անվախության եւ կատարած ճիշտ ընտրության համար եւ գոտեպնդել է շարունակելու պայքարը մինչեւ հաղթական ավարտ: «Կամ հարգեք ժողովրդի հաղթանակը, կամ ռադ եղեք»,- Սյունիքի իշխանություններից պահանջել է Հովհաննիսյանը:
Կապանում Հովհաննիսյանը եկել էր կապանցիների հետ տոնելու հաղթանակը, որ արձանագրվեց փետրվարի 18-ի ընտրություններում, որտեղ Հովհաննիսյանին իրենց քվեն էին տվել ընտրողների ավելի քան 54 տոկոսը: «Գարեգին Նժդեհը հաղթեց, Դուք բերեցիք Հայաստանի հաղթնակը»,- ասալ է Հովհաննիսյանը կապանցիներին, բարձրաձայնելով նաեւ Սյունիքի մարզպետի հրաժարականի իր պահանջը:
Գորիսում Սյունիքի մարզպետը հոգացել է, որ բարեւի հեղափոխության մունետիկներին դիմավորողները շատ չլինեն եւ անձամբ էլ Հովհաննիսյանի հետ հանդիպման չի եկել: Բարեւի հեղափոխաության արշավը Սյունիքի մարզում ավարտվել է Սիսիանում կայացած բազմամարդ հանդիպումով:
ՀԱՅԵՐԵՆ
Русский
English
Դաս. հայերեն
French
