ԵՐԵՎԱՆ, 15 ՓԵՏՐՎԱՐԻ, ՆՈՅՅԱՆ ՏԱՊԱՆ: «Մասնագիտական կրթության որակի ապահովման ազգային կենտրոն» (ՈԱԱԿ) հիմնադրամի հոգաբարձուների խորհրդի փետրվարի 15-ի նիստում, որը վարել է վարչապետ, հոգաբարձուների խորհրդի նախագահ Տիգրան Սարգսյանը, քննարկվել եւ ֆինանսների նախարարության դիտողություններով հանդերձ հաստատվել է հիմնադրամի 2011թ. տարեկան բյուջեի նախահաշիվը: Հիմնադրամի տնօրեն Ռուբեն Թոփչյանը հոգաբարձուների խորհրդին է ներկայացրել Հայաստանում նախնական, միջին եւ բարձրագույն ուսումնական հաստատությունների կրթության որակի արտաքին գնահատման` ինստիտուցիոնալ ու ծրագրային հավատարմագրման կարգի նախագիծը: Անդրադառնալով այդ երկու գործընթացների իրականացման մանրամասներին, խորհրդի անդամները քննարկել են ՀՀ-ում ինստիտուցիոնալ ու ծրագրային հավատարմագրման անցումային փուլի առանձնահատկությունները, ինչպես նաեւ ուսումնական հաստատություններում այդ ուղղությամբ փորձնական ծրագրի իրականացման հնարավորությունները: Ծավալված մտքերի փոխանակման ընթացքում հնչեել են մի շարք հարցադրումներ եւ առաջարկություններ նախագծի բովանդակության վերաբերյալ: Ամփոփելով արված դիտողությունները, Տ.Սարգսյանը հանձնարարել է կրթության եւ գիտության նախարարին ՈԱԱԿ-ի հիմնադրամի տնօրենի հետ համատեղ վերանայել նախագիծն ու վերամշակված տարբերակը ներկայացնել խորհրդի քննարկմանը: Ինչպես «ՆՏ»-ին հայտնեցին ՀՀ կառավարության Տեղեկատվության եւ հասարակայնության հետ կապերի վարչությունից, նիստում արծարծվել են նաեւ կազմակերպչական հարցեր: Մասնավորապես, քննարկվել է հիմնադրամի կանոնադրական նպատակների իրագործման համար գործունեության տարածքի ընդլայնման հարցը:

---