«Կոմիտաս Վարդապետ» համահայկական փառատոնի մասնակիցները Հրանուշ Հակոբյանի գլխավորությամբ այցելեցին Կոմիտասի անվան պանթեոն
26-09-2013 16:57:56 | Հայաստան | Մշակույթ
Սեպտեմբերի 26-ին «Կոմիտաս Վարդապետ» համահայկական փառատոնի մասնակիցները ՀՀ սփյուռքի նախարար Հրանուշ Հակոբյանի գլխավորությամբ այցելեցին Կոմիտասի անվան պանթեոն: Միջոցառմանը մասնակում էին փառատոնի գեղարվեստական խորհրդի անդամներ՝ ՀՀ ժողովրդական արտիստներ Տիգրան Մանսուրյանը, Հայաստանի պետական երգչախմբի գեղարվեստական ղեկավար և գլխավոր դիրիժոր Հովհաննես Չեքիջյանը, ՀՀ վաստակավոր արտիստ Սարգիս Նաջարյանը, փառատոնի ղեկավար Սամվել Հարոյանը, փառատոնին մասնակցող երգչախմբեր, անհատ կատարողներ, կոմիտասյան արվեստի երկրպագուներ: Մասնակիցները ծաղիկներ դրեցին և խնկարկեցին Մեծն Կոմիտասի շիրիմին:
Առաջնորդանիստ Սբ. Սարգիս եկեղեցու հոգևոր հովիվ արժանապատիվ Տեր Շահե քահանա Հայրապետյանը հոգեհանգստի կարգ կատարեց Կոմիտասի շիրիմին: Այնուհետև Գերմանիայի Համբուրգ քաղաքի «Գայանե» երգչախումբը և Մոսկվայի Հայորդաց տան «Օվսաննա» և «Նորահրաշ» երգչախմբերը հանդես եկան կոմիտասյան ստեղծագործությունների կատարումներով:
Նախարար Հրանուշ Հակոբյանի խոսքերով «Կոմիտաս Վարդապետ» փառատոնի անցկացումը խորհրդանշական է Հայոց ցեղասպանության 100-րդ տարելիցին ընդառաջ, քանի որ Կոմիտասը նաև ցեղասպանության խորհրդանիշ է:
Երգահաններ Տիգրան Մանսուրյանը և Հովհաննես Չեքիջյանը ողջունեցին աշխարհի տարբեր երկրներից մեծ երգահանին հարգանքի տուրք մատուցելու համար Հայաստան ժամանած երգչախմբերին և անհատ կատարողներին, միաժա,մանակ շնորհակալություն հայտնեցին ՀՀ սփյուռքի նախարարությանը այս հայաշունչ նախաձեռնության համար: