Թուրքիայում քուրդ ցուցարարների զոհերի թիվը հասել է 23-ի (Տեսանյութ)
10-10-2014 11:49:40 | Թուրքիա | Քաղաքական
Թուրքիայի ոստիկանության ու քուրդ ցուցարարների միջև գրանցված անկարգությունների զոհերի թիվը հասել է 23-ի: Տասնյակ մարդիկ վիրավորվել են: Ցույցերը հասել են մինչև Ստամբուլ, ավելի վաղ քրդերը ցույցերի էին դուրս գալիս հիմնականում Թուրքիայի արևելյան ու հարավ-արևելյան շրջաններում` Դիարբեքիրում, Մարդինում ու այլ քաղաքներում:
Քրդերը քննադատում են իշխանություններին անգործության համար, մինչդեռ սահմանամերձ Կոբանի քաղաքում կատաղի մարտեր են ընթանում «փեշմերգայի» աշխարհազորականների ու ջիհադիստների միջև: Անկարան ամրացրել է Սիրիայի հետ սահմանը, սակայն դեռևս չի խառնվում իրավիճակին:
Իր հերթին Թուրքիայի նախագահ Ռեջեփ Թայյիփ Էրդողանը բողոքի ցույցերն ու անկարգություններն անվանել է «սադրանքներ ու երկրի ներքին ու արտաքին քաղաքականության վրա ազդելու փորձ»: Նա նշել է, որ հսկայական վնաս է հասցվել պետական հաստատություններին, սեփականությանն ու տրանսպորտային միջոցներին:
Միևնույն ժամանակ տեղեկություններ են ստացվում, որ հենց քրդերի շարքերում էլ տարաձայնություններ կան` արմատական խնբերը դեմ են հանդես գալիս «փեշմերգային» աջակցելուն։