ԱՀԹ առաջնորդանիստ Ս. Սարգիս եկեղեցում տեղի ունեցավ Սուրբ Հարության Ճրագալույցի Ս. Պատարագը
04-04-2015 21:40:51 | Հայաստան | Մշակույթ
Արարատյան Հայրապետական թեմի առաջնորդանիստ Սուրբ Սարգիս եկեղեցում ապրիլի 4-ին, առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի հանդիսապետությամբ մատուցվեց Ճրագալույցի Ս. Պատարագ: Միջոցառմանը ներկա էին ՀՀ նախագահ Սերժ Սարգսյանը, ՀՀ պաշտպանության նախարար և ԱՀԹ առաջնորդանիստ Ս. Սարգիս եկեղեցու ջրօրհնեքի խաչքավոր Սեյրան Օհանյանը տիկնոջ հետ, Երևանի քաղաքապետ Տարոն Մարգարյանը:
Պատարագիչը Մայր Աթոռ Սուրբ Էջմիածնի միաբան Տ. Զաքարիա վարդապետ Բաղումյանն էր: Պատարագի ընթացքում հայր սուրբն ընթերցեց Ն.Ս.Օ.Տ.Տ. Գարեգին Բ Ամենայն Հայոց Հայրապետի ուղերձը Սուրբ Հարության տոնի առթիվ:
Ճրագալույցի Ս. Պատարագի վերջում ի լուր աշխարհի տրվեց Սուրբ Հարության Ավետիսը՝ «Քրիստոս Յարեաւ ի մեռելոց: Օրհնեալ է Յարութիւնն Քրիստոսի»:
Ճրագալույցի Ս. Պատարագից հետո Արարատյան հայարպետական թեմի առաջնորդարանում Տ. Նավասարդ Սրբազանի նախագահությամբ կատարվեց տնօրհնեքի արարողություն:Արարողության ավարտին ներկաները օրհնված սեղանի շուրջ գինով լի գավաթներով շնորհավորեցին միմյանց եւ տոնը խորհրդանշող Զատկի ձվեր կռվեցրին: Ճրագալույցի Ս. Պատարագից հետո, հավատացյալները Սուրբ Սեղանից իջեցրած կանթեղից վառված մոմեր տարան՝ իրենց ընտանիքներին Տիրոջ լույսն ու Հարության լուրը փոխանցելու:
Ստանալով Տ. Նավասարդ Սրբազանի օրհնությունը՝ թեմի երիտասարդները արդեն երկրորդ անգամ «Հարության Ավետիս» խորագրով կանթեղներով երթ իրականացրին: Հազարավոր հայորդիներ առաջնորդանիստ Ս. Սարգիս եկեղեցուց վառվող կանթեղներով ու շարականների երգեցողությամբ քայլեցին մինչև Հանրապետության հրապարակ: Քարե գորգի վրա խաչի տեսքով կանգնելով՝ նրանք Սուրբ Հարության Ավետիսը տվեցին: Երթին մասնակցում էին Արարատյան Հայրապետական թեմի, ՀՀԿ և ՀՅԴ կուսակցությունների երիտ. թևերի, Հայաստանի ազգային սկաուտական շարժման, երիտասարդական հասարակական տարբեր կազմակերպությունների անդամներ, զինվորներ, ոստիկանական ակադեմիայի սաներ:
ՀԱՅԵՐԵՆ
Русский
English
Դաս. հայերեն
French
