Երևանում հանդիսավոր կերպով նշվեց ՀՀ ժողովրդական նկարիչ Ռոբերտ Էլիբեկյանի տարեդարձը (տեսանյութ)
03-05-2016 18:24:49 | Հայաստան | Հասարակություն
Հայ մեծանուն արվեստագետ, ՀՀ ժողովրդական նկարիչ Ռոբերտ Էլիբեկյանն ապրիլի 21-ին դարձավ 75 տարեկան: Մեծ վարպետի հոբելյանական երեկոն առանձնահատուկ կերպով նշվեց Երևանի ռուսական արվեստի թանգարանում. Ծննդյան տոնի կապակցությամբ Ռ. Էլիբեկյանին հանդիսավոր կերպով շնորհավորեցին նրա ընկերներն ու բարեկամները:
Որպես յուրօրինակ նվեր` թանգարանի ավագ գիտաշխատող Լիլիթ Սարգսյանը ներկայացրեց իր հեղինակած զեկույցը` «Ռոբերտ Էլիբեկյանի արվեստը և սիմվոլիզմի դարաշրջանի արձագանքումները 1970-80-ական թվականներին (խորհրդա)հայ արվեստում» թեմայով, որին հաջորդեց Ջուլիետ Կաժոյանի հեղինակած Ռ. Էլիբեկյանին նվիրված վավերագրական ֆիլմի ցուցադրությունը:
Հոբելյանական երեկոյի շրջանակներում ողջույնի խոսքով հանդես եկավ թանգարանի տնօրենի ժամանակավոր պաշտոնակատար Մարինե Մկրտչյանը:
Վերջինիս փոխանցմամբ` Ռուսական արվեստի թանգարանում Ռոբերտ Էլիբեկյանի արվեստի ներկայացումը պայմանավորված է ոչ միայն հարգանքի տուրք մատուցելու ցանկությամբ մեծ արվեստագետին, այլև գաղափարական իմաստ է կրում:
Ռոբերտ Էլիբեկյանը XX դարի երկրորդ կեսի ամենանշանավոր հայ արվեստագետներից է, ում գեղանկարչությունը դարձավ իր ժամանակի հայ արվեստի խորհրդանիշը և նոր ուղի բացեց հետվաթսունական հայ կերպարվեստում: «Թիֆլիսյան դպրոցի» վառ ներկայացուցիչը հակադրվելով խորհրդային պաշտոնական արվեստին և մերժելով ամբողջատիրական համակարգի կանոնները, հաստատեց մաքուր արվեստի ինքնուրույն արժեքը:
Թիֆլիսահայ Էլիբեկյանների տոհմից սերած արվեստագետը մանկուց ի վեր կապված է եղել թատրոնի հետ. նա ճանաչված է նաև իր բազմաթիվ թատերական ձևավորումներով:
Երեկոյի ընթացքում ներկաները, այդ թվում Երևանի Պետական Համալսարանի և Երևանի Գեղարվեստի Պետական Ակադեմիայի արվեստաբանական բաժնի ուսանողները, բացառիկ հնարավորություն ունեցան անմիջական մթնոլորտում հաղորդակցվել և հարցեր տալ մեծ վարպետին:
ՀԱՅԵՐԵՆ
Русский
English
Դաս. հայերեն
French
