Ճապոնիան մտադիր է ԱՄՆ-ի հետ պայքարել ահաբեկչության դեմ
13-06-2016 13:05:32 | Ճապոնիա | Միջազգային
Ճապոնիայի վարչապետ Սինդզո Աբեն հայտարարել է, որ Օրլանդոյի դեպքերից հետո երկիրը պատրաստ է ԱՄՆ-ի հետ պայքարել ահաբեկչության դեմ: gazeta.ru-ի փոխանցմամբ` Ճապոնիայի վարչապետը նաև իր ցավակցություններն է հայտնել ԱՄՆ-ի նախագահ Բարաք Օբամային Օրլանդո նահանգում գեյ ակումբում տեղի ունեցած կրակոցների զոհերի հետ կապված:
«Կիսում ենք ահաբեկչության դեմ պայքարելու ուժեղ վճռականությունը և կշարունակենք անդադար պայքարել ահաբեկչության դեմ ԱՄՆ-ի և միջազգային հանրության հետ համատեղ: Ահաբեկչությունը չի կարող արդարացվել ոչ մի կերպ, ուստի այն վճռականորեն դատապարտում ենք»,- հայտարարել է Աբեն:
Ավելի վաղ, թուրքական Yeni Akit պարբերականն Օրլանդոյի գեյ ակումբում կատարված ահաբեկչության հիսուն զոհվածներին անվանել էր «այլասերվածներ»:
Հիշեցնենք, որ հունիսի 12-ին Ֆլորիդա նահանգի Օրլանդո քաղաքում տեղակայված Pulse գեյ ակումբում կատարված ահաբեկչությանը զոհ էր գնացել 50 մարդ, ևս 50-ը` վիրավորվել էին:
Նախնական կասկածյալ է ճանաչվել ԱՄՆ-ի 29-ամյա քաղաքացի Օմար Մատինն Աֆղանստանից գաղթած ընտանիքից: