ԱՄՆ նորընտիր նախագահը հրաժարվել է աշխատավարձից. նա տարեկան ստանալու է 1 դոլար
14-11-2016 13:00:39 | ԱՄՆ | Հասարակություն
Դոնալդ Թրամպը, ընտրվելով ԱՄՆ նախագահ, հայտարարել է, որ հրաժարվում է նախագահական աշխատավարձից, որը տարեկան կազմում է 400 հազար դոլար և ստանալու է ընդամենը 1դոլար:
Interfax.ru-ի փոխանցմամբ` Թրամպը հիշեցրել է, որ այդ մասին ինքը խոսել է դեռ նախընտրական քարոզարշավի ժամանակ:
«Կարծում եմ, որ ըստ օրենքի` տարեկան կստանամ 1 դոլար»,- ասել է նա:
Թրամպի հայտարարության մասին բարձրաձայնվել է բողոքի ակցիաների ֆոնին, որոնք երկրում ընթանում են նոյեմբերի 8-ից, երբ հայտնի դարձան ընտրությունների արդյունքները: Մի շարք խոշոր քաղաքներում մարդիկ դուրս են եկել փողոց` ընտրված նախագահին մեղադրելով ռասիզմի, սեքսիզմի, հոմոֆոբիայի, քսենոֆոբիայի և միլիտարիզմի մեջ:
Միևնույն ժամանակ Դ. Թրամպի դեմոկրատ մրցակից Հիլարի Քլինթոնն ընդունել է իր պարտությունը:
Ցույցերի հետ կապված Թրամպը դիմել է փողոց դուրս եկած մարդկանց` կոչ անելով վերջիններիս չվախենալ իրենից: Նա նշել է, որ քաղաքական արենայում իրեն լավ կդրսևորի: