Սուրեն Կարայանին հանձնարարվեց ակտիվ աշխատանքներ իրականացնել հայ-ռուսական ներդրումային հիմնադրամի ձևավորման մեկնարկն ապահովելու ուղղությամբ
26-01-2017 13:56:23 | Հայաստան | Հասարակություն
ՀՀ կառավարության հունվարի 26-ի նիստը մեկնարկեց վարչապետ Կարեն Կարապետյանի հանձնարարականներով, որոնց մի մասը պայմանավորված են օրերս նրա Ռուսաստանի Դաշնություն կատարած պաշտոնական այցով:
Վարչապետի առաջին հանձնարարականն ուղղված էր ՀՀ Տնտեսական զարգացման և ներդրումների նախարար Սուրեն Կարայանին, որով վերջինս պարտավորվում է Ռուսաստանում ձեռք բերված պայմանավորվածությունների իրականացման նպատակով ՌԴ համապատասխան գերատեսչությունների հետ ակտիվ աշխատանքներ իրականացնել հայ-ռուսական ներդրումային հիմնադրամի ձևավորման մեկնարկն ապահովելու ուղղությամբ, ինչպես նաև Մեղրիի տարածաշրջանում ստեղծվելիք ազատ տնտեսական գոտում ռուսական կապիտալի ներգրավվածություն ապահովելու համար` ներկայացնելով կատարված և ընթացիկ աշխատանքների վերաբերյալ ամենամսյա հաշվետվություն:
Սուրեն Կարայանին նաև հանձնարարվեց Երևանի քաղաքապետարանի, նախարարությունների, պետական կառավարման համապատասխան կառույցների և այլ մարմինների հետ միասին քննարկել 2017 թվականի ընթացքում գործարար միջավայրի բարելավման անհրաժեշտ միջոցառումները` ուշադրություն դարձնելով Համաշխարհային բանկի համապատասխան զեկույցի այն ցուցանիշների վրա, որոնցով Հայաստանն ունի ցածր արդյունքներ, նաև մշակել անհրաժեշտ գործողությունների վերաբերյալ առաջարկություններ՝ նպատակ ունենալով էապես բարելավել և պարզեցնել վարչարարական ներկա ընթացակարգը:
Մշակվելիք առաջարկությունները ՀՀ կառավարության հաստատմանը պետք է ներկայացվեն մինչև սույն թավականի փետրվարի 20-ը:
ՀԱՅԵՐԵՆ
Русский
English
Դաս. հայերեն
French
