Վարչապետը հորդորեց թիմակիցներին աշխատել արտակարգ ռեժիմով
06-04-2017 11:36:16 | Հայաստան | Հասարակություն
Ընտրություններն անցել են հանդուրժողականության մթնոլորտում, մեր թիմը ստացել է երկրում փոփոխություն իրականացնելու քվեն, այդ իսկ պատճառով թիմակիցներին հորդորում եմ աշխատել արտակարգ ռեժիմով: Այսպես սկսեց ապրիլի 6-ին կայացած ՀՀ կառավարության նիստը վարչապետ Կարեն Կարապետյանը:
Վերջինս մինչև նիստի օրակարգին անցնելը, հանդես եկավ հանձնարարականներով:
Մասնավորապես, առաջին հանձնարարականը վերաբերում էր կառավարության ծրագրով հաստատված միջոցառումների և գերակա խնդիրների կատարման հաշվետվության վերաբերյալ:
«2016 թվականի հոկտեմբերի 21-ին ՀՀ Ազգային Ժողովը հավանություն տվեց մեր կողմից մշակված կառավարության ծրագրին. հաշվի առնելով, որ կարճաժամկետ միջոցառումների համար սահմանված ժամկետն ավարտվել է և առկա են նոր միջոցառումների ու գերակա խնդիրների մշակման նոր կարգի անհրաժեշտություն»,- ասաց նա:
Վարչապետը հանրապետության գործադիր մարմինների ղեկավարներին հանձնարարեց. Առաջին. Մեկ շաբաթյա ժամկետում կառավարության աշխատակազմ ներկայացնել 2016 թվականի կառավարության ծրագրով հաստատված միջոցառումների և գերակա խնդիրների կատարման վերաբերյալ հաշվետվություն:
Երկրորդ. Մեկամսյա ժամկետում կառավարության աշխատակազմ ներկայացնել ոլորտային զարգացման հինգ տարվա ծրագիր՝ մանրամասնելով առաջիկա տարվա հիմնական ուղղությունները, միջոցառումները և գերակա խնդիրները՝ հստակ նշելով դրանց կատարման իրատեսական ժամկետները:
Երրորդ. Հաշվի առնելով հանրության հետ հետադարձ կապի կարևորությունը և անհրաժեշտությունը՝ ոլորտային զարգացումների և իրականացված գործողությունների վերաբերյալ հանրությանը պարբերաբար ներկայացնել համապատասխան տեղեկատվություն:
ՀԱՅԵՐԵՆ
Русский
English
Դաս. հայերեն
French
