Արամ Ա կաթողիկոսի տնօրինությամբ Տեր Զորը կունենա իր կենտրոնական
հանձնախումբը
26-01-2010 16:00:00 | Լիբանան | Հասարակություն
ԱՆԹԻԼԻԱՍ: Ինչպես հաղորդում են Մեծի Տանն Կիլիկիո կաթողիկոսության մամլո
ծառայությունից, Մեծի Տանն Կիլիկիո Արամ Ա կաթողիկոսը ութ տարի առաջ
Տեր Զորը հռչակել է Համազգային ուխտատեղի` նկատի ունենալով
Տեր Զորի ներկայացրած
հատուկ կարեւորությունը հայկական ցեղասպանության ճանաչման եւ
ազգային պահանջատիրության հարցում: Այդ առիթով Արամ Ա-ն կոչ է
ուղղել ժողովրդին` ուխտի գնալ այնտեղ, նորոգել
հավատարմությունը մեկուկես միլիոն նահատակների նվիրական հիշատակին:
Տեր Զորի կարեւորությունը շեշտելու եւ ուխտագնացությունները
ավելի կազմակերպելու նպատակով Մեծի Տանն Կիլիկիո
կաթողիկոսությունը հատուկ ուղեգիծ է մշակել եւ դրանք գործադրելու
համար իր պատգամներն է փոխանցել Բերիո Հայոց թեմին:
Հաղորդագրությունից տեղեկանում ենք, որ Բերիո հայոց թեմի
անմիջական հսկողությամբ` Տեր Զորի համալիրի, շրջակայքում գտնվող
Մարկատեի ու այլ եկեղեցիների եւ նահատակաց վայրերի հատուկ
տեսչություն է հաստատվել: Հիշյալ շրջանի տեսուչ է նշանակվել Մեծի
Տանն Կիլիկիո կաթողիկոսության միաբաններից Վահան վարդապետ
Բերբերյանը:
Տեր Զորին եւ շրջանին առնչվող բոլոր միջոցառումների,
ուխտագնացությունների ու աշխատանքների ընդանուր պատասխանատու
Կենտրոնական հանձնախումբ է նշանակվել, որի նախագահն է Շահան
եպիսկոպոս Սարգիսյանը: Հանձնախմբի կազմում ընդգրկվել են Գրիգոր
վարդապետ Չիֆթճյանը, Հակոբ Աթեշյանը, Արմեն Խաչատուրյանը, Սիլվա
Ճապաղջուրյանը, Հարություն Վարդանյանը, Ենովք Սյուլահյանը եւ Վահե
Ժամկոչյանը: Բերիո հայոց թեմի կողմից պատրաստվել եւ Արամ Ա
կաթողիկոսի կողմից հաստատվել է Կենտրոնական հանձնախմբի եւ
տեսչության գործունեության հատուկ կանոնադրություն: