Նախարարը բելառուս գործընկերոջ հետ քննարկել է տրանսպորտային համագործակցության հեռանկարները

29-06-2017 19:59:03 | Հայաստան | Տնտեսություն

ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը հունիսի 29-ին ընդունեց Բելառուսի Հանրապետության տրանսպորտի և հաղորդակցության նախարար Անատոլի Սիվակին:

Կողմերը ստորագրեցին «1997 թվականի սեպտեմբերի 20-ին ստորագրված Հայաստանի Հանրապետության կառավարության և Բելառուսի Հանրապետության կառավարության միջև միջազգային ավտոմոբիլային հաղորդակցության մասին համաձայնագրում փոփոխություններ և լրացումներ կատարելու մասին» արձանագրությունը:

Համաձայնագրով կարգավորվում են երկու պետությունների միջև միջպետական ուղևորափոխադրումների և բեռնափոխադրումների իրականացման մեխանիզմները, իսկ դրանում փոփոխություններ կատարելու անհրաժեշտությունը առաջացել է Հայաստանի`ԵՏՄ-ին անդամակցելուց հետո :

Արձանագրության ստորագրման և իրականացվող փոփոխությունների արդյունքում երկու անդամ-պետությունները կազատվեն մուտքի, ելքի, տարանցման և ԵՏՄ անդամ-երկրների տարածքում դեպի 3-րդ երկիր և 3-րդ երկրից պետական բեռնափոխադրումների իրականացման համար թույլտվությունների պարտադիր

պահանջից և ճանապարհային վճարից:

Սա կհանգեցնի երկու երկրների միջև միջազգային բեռնափոխադրումների գործընթացի դյուրացմանը, բեռնափոխադրումների իրականացման ժամանակի, ծախսերի կրճատմանը և ապրանքաշրջանառության աճին:

Նախարարների հանդիպման ընթացքում քննարկվեցին նաև ավտոմոբիլային տրանսպորտային համագործակցության զարգացման և ընդլայնման հարցեր:

ՀՀ տրանսպորտի, կապի և տեղեկատվական տեխնոլոգիաների

նախարարության լրատվական ծառայություն

Նոյյան տապան - Տնտեսություն