Թումանյանական հայտնի և սիրելի հերոսների արձանները զարդարել են բանաստեղծի ծննդավայրի հրապարակը և տուն-թանգարանի բակը (ֆոտոշարք)
26-09-2017 15:00:34 | Հայաստան | Հասարակություն
Ամենայն հայոց բանաստեղծ Հովհաննես Թումանյանի հեքրիաթների հայտնի և սիրելի հերսոներն այսուհետ ընթերցասեր հայությանը կողջունեն ոչ միայն գրքերից, այլև հենց Դսեղում գտնվող Թումանյանի տուն-թանգարանի բակում:
«Շունն ու կատվի», «Անհաղթ աքաղաղի», «Պոչատ աղվեսի», «Սուտլիկ որսկանի» և այլ թումանյանական հերոսների փայտե արձաններն իրենց ներկայությամբ թանգարան այցելողների տպավորություններն ավելի վառ ու գունեղ կդարձնեն:
Իրականում վերոնշյալ փայտե արձանները միակ նորամուծությունը չեն Հ. Թումանյանի տուն-թանգարանում:
Օրերս ՀՀ Մշակույթի նախարար Արմեն Ամիրյանի մասնակցությամբ այնտեղ տեղի ունեցավ բացօթյա ցուցասրահի, հանգստյան տաղավարի և սանհագույցի, ինչպես նաև Դսեղի հրապարակում թումանյանական հերոսների` քարե քանդակների շարքի բացման արարողությունը:
Նշենք, որ թանգարանի բակում բացօթյա ցուցասրահի, հանգստյան տաղավարի և սանհագույցի շինարարությունն իրականություն է դարձել ամերիկահայ երաժիշտ, բարերար Աշոտ Տիգրանյանի նվիրատվության շնորհիվ:
«Թումանյանական հերոսների գեղեցիկ արձանների ստեղծումն ավելի երևակայական դարձրեց այս միջավայրը, իսկ թանգարանի հարևանությամբ գտնվող այս հրաշալի ենթակառուցվածքը կնպաստի, որպեսզի թանգարան այցելողներն ավելի երկար ժամանակ անցկացնեն այստեղ: Թույլ տվեք շնորհակալություն հայտնել Ա. Տիգրանյանին, ում ֆինանսական ներդրման շնորհիվ հնարավոր եղավ նման ենթակառուցվածք ունենալ թանգարանի բակում,- նկատեց Ա. Ամիրյանը` շնորհակալություն հայտնելով նաև փայտե քանդակների երիտասարդ հեղինակներին:
Նախարարի փոխանցմամբ` փայտե քանդակները ստեղծվել են հատված ծառերի բների վրա, որոնք սնամեջ էին և վտանգ էին ներկայացնում թանգարանի համար:
Նրա վստահեցմամբ` կատարվող աշխատանքներն ընդամենը նախապատրաստական փուլն են 2019 թվականին նախատեսված Հ. Թումանյանի 150-ամյա հոբելյանին նվիրված տոնական միջոցառումների:
Այդ ծառերի փոխարեն Արմեն Ամիրյանը, Աշոտ Տիգրանյանը և Լոռու մարզպետ Արթուր Նալբանդյանը նոր ծառեր տնկեցին, որոնք ունեն ուղղահայաց, ոչ խորունկ արմատներ և հետագայում չեն քանդի շենքի հիմքը:
Իր հերթին Դսեղում Հ. Թումանյանի տուն-թանգարանի տնօրեն Ռոզա Ղազումյանի գնահատմամբ` թանգարանի բակում տեղադրված փայտե արձանները և բացված նոր ենթակառուցվածքը կնպաստեն այցելուների թվի ավելացմանը:
«Սանհանգույցի և բացօթյա տաղավարի բացմանը շատ երկար էինք սպասել: Այստեղ այսուհետ հնարավոր կլինի ցուցահանդեսներ և այլ հետաքրքիր միջոցառումներ իրականացնել»,- նշեց Ռ. Ղազրումյանը` տեղեկացնելով, որ առաջիկայում պատրաստվում են «Թումանյանական օրերին»:
Հ. Թումանյանի 150-ամյա հոբելյանին ընդառաջ այս տարի սպասվում են թումանյանական գրքերի հրատարակումներ, փաստավավերագրական ֆիլմերի նկարահանումներ, համերգային ծրագրեր, ներկայացումների բեմադրում և այլ մշակութային միջոցառումներ: