Կիոկուշին կարատեի Հայաստանի 12-րդ բաց առաջնության հաղթողները կմասնակցեն հաջորդ տարի Երևանում կայանալիք Եվրոպայի առաջնությանը (տեսանյութ)
30-10-2017 15:20:47 | Հայաստան | Սպորտ
Երևանում անցկացվեց Կիոկուշին կարատեի Հայաստանի 12-րդ բաց առաջնությունը:
«Միկա» մարզահամալիրում կայացած լայնածավալ ստուգատեսին մասնակցեցին ավելի քան 300 մարզիկներ Հայաստանից, Արցախից, հարևան Վրաստանից, Իրանից, ինչպես նաև Ռուսաստանից:
Առաջնությունը մեկնարկեց ցուցադրական մարտերով:
Կիոկուշին կարատեի Հայաստանի 12-րդ բաց առաջնությունը նախորդներից տարբերվում է նրանով, որ այս առաջնության հաղթողները՝ 1-ին և 2-րդ մրցանակային տեղերը զբաղեցրած մարզիկները մասնակցելու են հաջորդ տարի Երևանում կայանալիք Եվրոպայի առաջնությանը:
«Կուզենայի նաև նշել, որ 2017 թվականին Հայաստանի Կիոկուշին կարատեի ֆեդերացիան ընդունվեց Սպորտի և երիտասարդության հարցերի նախարարության կողմից և դարձավ ինքնուրույն մարզաձև»,- նշեց ֆեդերացիայի նախագահ Անդրանիկ Հակոբյանը:
Նրա փոխանցմամբ՝ ֆեդերացիայի պաշտոնական ճանաչումը ենթադրում է նաև պետական ֆինանսական աջակցություն շուրջ 2 մլն դրամի չափով, որը մարզաձևը զարգացնելու նպատակով կտրամադրվի 2018 թվականից:
«Նշանակվելուս օրվանից միշտ ասել եմ, որ այն ֆեդերացիաները, որոնք կհամապատասխանեն մեր կարգերին, այսինքն՝ չորս կետ կա, որը պետք է իրականացվի, անպայման կընդգրկվեն պետական ծրագրի մեջ՝ ճանաչվելով ինքնուրույն մարզաձև»,- նշեց ՀՀ սպորտի և երիտասարդության հարցերի նախարար Հրաչյա Ռոստոմյանը՝ ընդգծելով, որ կիոկուշին մարզաձևում նշյալ ֆեդերացիան միակն է, որը ճանաչվել է պետության կողմից:
Նախարարի խոսքերով՝ այսուհետ կիոկուշին մարզաձևում Հայաստանի բաց առաջնության հաղթողները կհամարվեն չեմպիոն և կստանան միջազգային մրցույթներում Հայաստանը ներկայացնելու իրավունք:
Արդեն 12 տարի գործող ֆեդերացիան, մասնակցելով մի շարք միջազգային մրցաշարերի, ընդհանուր առամամբ նվաճել է 112 ոսկե, 91 արծաթե և 109 բրոնզե մեդալ:
Չդնելով տարիքային սահմանափակում և սեռային տարբերակում՝ Երևանում, Հայաստանի մարզերում և Արցախում մարզվող ավելի քան 3 հազար տղաների և աղջիկների համար ստեղծվել են բոլոր հարմարավետ պայմանները:
Ի դեպ՝ 16 տարեկանից բարձր բոլոր մարզիկները ֆեդերացիայում մարզվում են անվճար: