Հայաստանի Ազգային Ժողովը սեպտեմբերի 16-ին վավերացրեց 4
միջազգային վարկային համաձայնագիր
16-09-2009 19:12:00 | Հայաստան | Տնտեսություն
ԵՐԵՎԱՆ, 16 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի Ազգային
Ժողովը սեպտեմբերի 16-ին վավերացրեց նախօրեին քննարկված 4
միջազգային վարկային համաձայնագրեր:
Հայաստանի Հանրապետության եւ Միջազգային զարգացման
ընկերակցության միջեւ 2009թ.-ի հուլիսի 7-ին ստորագրված «Զարգացման
քաղաքականության առաջին գործողություն» ֆինասավորման համաձայնագրով
ՀՀ-ին կտրամադրվի 40,4 մլն SDR-ին (Հատուկ փոխառության
իրավունքներին) համարժեք գումար կամ շուրջ 61 մլն ԱՄՆ դոլարի վարկ:
Ըստ հիմնական զեկուցող, ՀՀ ֆինանսների փոխնախարար Վարդան Արամյանի,
վարկը տրամադրվում է 20 տարի ժամկետով, որից 10 տարին` առանց
գումարի մարման իրավունքի:
Հայաստանի Հանրապետության եւ Վերակառուցման եւ զարգացման
միջազգային բանկի միջեւ 2009թ.-ի հուլիսի 31-ին ստորագրված
«Ոռոգման համակարգերի վերականգնման հրատապ ծրագիր» փոխառության
համաձայնագրով կտրամադրվի 30 մլն ԱՄՆ դոլար 27 տարի ժամկետով, որից
5-ը` արտոնյալ: Համաձայնագրի նպատակն է ընտրված տարածքներում
ոռոգման ջրի օգտագործման արդյունավետության բարելավումը եւ
գյուղական շրջաններում անմիջական զբաղվածության խթանումը: Ըստ
հիմնական զեկուցող, ՀՀ տարածքային կառավարման նախարարության Ջրային
տնտեսության պետական կոմիտեի նախագահ Անդրանիկ Անդրեասյանի, երկու
տարում նախատեսվում է վերականգնել 83,81 կմ երկարությամբ գլխավոր
ջրանցքներ, այդ թվում Թալինի (59,01 կմ ) եւ Արմավիրի (24,8 կմ )
ոռոգման համակարգերում:
Հայաստանի Հանրապետության եւ Միջազգային զարգացման
ընկերակցության միջեւ 2009թ.-ի հուլիսի 21-ին ստորագրված Զարգացման
քաղաքականության վարկի երկրորդ ծրագրի նախապատրաստման ՄԶԸ Ք670-ԱՄ
կանխավճարի համաձայնագրով կտրամադրվի 590 հազար ԱՄՆ դոլար: Գումարը
կուղղվի ծրագրի խորհրդատվական ծառայություններին:
Հայաստանի Հանրապետության եւ Ասիական զարգացման բանկի միջեւ
2009թ.-ի հուլիսի 15-ին ստորագրված «Ճգնաժամի հաղթահարման
աջակցության ծրագրի (հատուկ գործողություններ)» վարկային
համաձայնագրով նախատեսված է երկու մասով վարկի տրամադրում 51,378
մլն SDR ընդհանուր գումարով կամ 80 մլն ԱՄՆ դոլար: Վարկային
համաձայնագրի տեւողությունը 24 տարի է, որից 8 տարին առանց գումարի
մարման իրավունքի: Ըստ հիմնական զեկուցող ՀՀ էկոնոմիկայի նախարար
Ներսես Երիցյանի, համաձայնագրի նպատակն է օժանդակել ՀՀ-ին`
համաշխարհային ֆինանսատնտեսական ճգնաժամի ազդեցությունը
մեղմացնելու հարցում: