Բժիշկները բացահայտել են տաք թեյի և կերակրափողի քաղցկեղի կապը
06-02-2018 14:54:13 | | Գիտություն եւ տեխնոլոգիաներ
Ալկոհոլի և ծխախոտի օգտագործումը տաք թեյի հետ մեծացնում է կերակրափողի քաղցկեղի վտանգը: Այդպիսի եզրահանգման եկել է չինացի գիտնականների խումբը, որի աշխատանքը հրապարակվել է Annals of Internal Medicine ամսագրում:
Interfax-ի փոխանցմամբ՝ բժիշկները 9 տարվա ընթացքում ուսումնասիրել են 30-ից 79 տարեկան շուրջ 456 հազար մարդու առողջական վիճակը և սննդային սովորությունները:
Այդ ողջ ժամանակահատվածում նրանք հայտնաբերել են կերակրափողի քաղցկեղի 1731 դեպք:
Գիտնականները հաստատել են, որ նմանատիպ ուռուցքները 5 անգամ ավելի հաճախ է հանդիպում այն մարդկանց մոտ, ովքեր պարբերաբար տաք թեյ և օրվա ընթացքում նվազագույնը 15 գրամ ալկոհոլ են խմել: Միաժամանակ կերակրափողի քաղցկեղ երկու անգամ ավելի հաճախ հանդիպել է տաք ըմպելիքների սիրահարների մոտ, ովքեր նաև ծխում են:
Հետազոտության հեղինակաները ենթադրում են, որ 65 աստիճան Ցելսուսից բարձր ջերմությամբ ըմպելիքները վնասում են ներքին օրգանները, ինչը մեծացնում է քաղցկեղի զարգացման հնարավորությունը:
Նրանք խորհուրդ են տալիս չափազանց զգույշ վերաբերել տաք հեղուկներին, հատկապես այն դեպքում, երբ միաժամանակ պատրաստվում են ծխել կամ ալկոհոլ օգտագործել: