ԻՏՁՄ-ն աջակցում է ՏՏ ոլորտի սկսնակ ձեռնարկությունների
կողմից համատեղ քայլերի ձեռնարկմանը
17-07-2009 17:00:00 | Հայաստան | Տնտեսություն
ԵՐԵՎԱՆ, 17 ՀՈՒԼԻՍԻ, ՆՈՅՅԱՆ ՏԱՊԱՆ: Հայաստանի տեղեկատվական
տեխնոլոգիաների ոլորտի սկսնակ ձեռնարկությունների զարգացման
ուղիների եւ խոչընդոտների բացահայտմանն էր նվիրված հուլիսի 17-ին
Ինֆորմացիոն տեխնոլոգիաների ձեռնարկությոնների միության (ԻՏՁՄ)
կազմակերպած համաժողովը, որին մասնակցեցին ոլորտի շուրջ մեկ
տասնյակ սկսնակ ձեռնարկությունների, ոլորտի ու փոքր եւ միջին
ձեռնարկատիրության զարգացմանն աջակցող կառույցների
ներկայացուցիչներ:
Ինչպես նշեց ԻՏՁՄ-ի գործադիր տնօրեն Կարեն Վարդանյանը,
միջոցառման նպատակն է ՏՏ սկսնակ ձեռնարկությունների կողմից համատեղ
քայլերի նախաձեռնումը: Ըստ նրա, հնարավոր է, որ դրանց իրականացման
համար անհրաժեշտ լինի ձեւավորել այդ ձեռնարկություննների շահերը
պաշտպանող կառույց: Կ.Կարդանյանն ԻՏՁՄ-ի անունից հայտնեց
ստեղծվելիք կառույցին աջակցություն տրամադրելու
պատրաստակամություն: ՏՏ ոլորտի սկսնակ ձեռնարկություններին
առաջարկվեց, բացի միմյանց միջեւ քննարկումներից, անցկացնել
հանդիպումներ ՏՏ ոլորտի առաջատար ընկերությունների ղեկավարների
հետ` վերջիններիս հաջող փորձին ծանոթանալու նպատակով:
ԻՏՁՄ-ի գործադիր տնօրենը հիշեցրեց, որ 2008թ.-ին ՀՀ
կառավարության կողմից հաստատված ՏՏ ոլորտի զարգացման հայեցակարգի
համաձայն, ոլորտի ընկերությունների թիվը նախատեսվում է ներկայիս
200-ից հասցնել 1 հազարի: Նրա գնահատմամբ, այդ նպատակին հասնելու
համար տարեկան պետք է բացվեն 500 - 1 000 ձեռնարկություններ, եւ
ապահովվեն այնպիսի պայմաններ, որ դրանցից առնվազն 100-ը կարողանա
զարգանալ:
ԻՏՁՄ-ի նախագահ Հովհաննես Ավոյանն իր հերթին առաջարկեց ոլորտի
նոր ձեռնարկություններ կազմավորելիս նկատի ունենալ նոր արտադրանքի
մշակումը, այդ նպատակով հետամուտ լինել ձեռնարկություններում
անհրաժեշտ մասնագետների ներգրավմանը: Նա կարեւորեց նշված
ձեռնարկությունների կողմից աշխատուժի եւ հնարավոր պատվիրատուների
տվյալների շտեմարանների ընդլայնումը:
Համաժողովի մասնակիցներն անդրադարձան նաեւ ՏՏ ոլորի սկսնակ
ձեռնարկությունների փորձին, նրանց պետական աջակցության եւ
արտոնությունների տրամադրման, կրթական համակարգում շուկայի
պահանջներին համապատասխանող ծառայությունների տրամադրման, բիզնես
միջավայրի, մասնավորապես` բիզնեսի գրանցման եւ հարկային
վարչարարության, ձեռնարկությունների կողմից մարքեթինգի վարման
կարողությունների զարգացման խնդիրներին:
Միջոցառման շրջանակներում ներկայացվեցին «Microsoft Bizpark»
ծրագիրը, Հայաստանի Փոքր եւ միջին ձեռնարկատիրության զարգացման
ազգային կենտրոնի կողմից տրամադրվող աջակցությունը եւ «Օրանժ
ֆրանչայզ հայեցակարգ»-ը: