Սյունիքում առաջնահերթ խնդիր է համերաշխության վերականգնումը. Նախկին մարզպետին հաջողվել է պառակտել սյունեցիներին (ՏԵՍԱՆՅՈՒԹ)
14-06-2018 19:17:01 | Հայաստան | Հասարակություն
Սյունիքի նախկին մարզպետին հաջողվել է պառակտել սյունեցիներին, ուստի առաջնահերթ խնդիր է համերաշխության վերականգնումը:
Այս մասին հունիսի 13-ին լրագրողների հետ հանդիպման ժամանակ նշեց «Սյունյաց երկիր» թերթի խմբագիր Սամվել Ալեքսանյանը:
Ըստ նրա՝ Սյունիքի մարզում մեկընդմիշտ պետք է փակվի «վահեհակոբյանական ամոթալի» էջը:
«Այդ էջը մեր բազմադարյա պատմության ամենաանպատվաբեր էջն է, որը չի փակվում միայն Վահե Հակոբյանին մարզպետի պաշտոնից հեռացնելով: Ես չեմ ՀՀ մի պաշտոնյա, ում ամսական աշխատավարձը կազմում է մոտավորապես 600 հազար դրամ, կարողանա մեկ տարվա մեջ կուտակել 1,5 մլն դոլարի չափով կարողություն»,- ընդգծեց Ս. Ալեքսանյանը՝ հավելելով, որ այդ գումարները պետք է վերադարձվեն պետական բյուջե:
Բանախոսի փոխանցմամբ՝ նախկին մարզպետի հետ կապված հաջորդ խնդիրն այն է, որ Վահե Հակոբյանի շահագրգռվածությամբ և ուղղորդմամբ մարզի իրավապահ մարմինները բազմաթիվ քրեական գործեր են հարուցել, որոնց ուղղությամբ նախաքննությունը շարունակվում է նույն տեմպերով և որոնց մինչ օրս գնահատական չի տրվել:
Ս. Ալեքսանյանը պնդեց, որ Սյունիքի նախկին մարզպետի կամայականությամբ աշխատանքից հեռացրել են տասնյակ մասնագետների՝ Սմբատ Օրբելյան-Կապանի հիվանդանոցի տնօրեն, ճանաչված բժիշկ, Լեռնիկ Պետրոսյան- գիտությունների դոկտոր, պրոֆեսոր, Լիլիթ Առաքելյան- Սյունիք գյուղի դպրոցի տնօրեն և այլոք:
«Վահե Հակոբյանը բազմիցս ապացուցել է, որ ՀՀ Սահմանադրությունը և օրենքները նախևառաջ պետք է համահունչ լինեն իր կամքին: Որպեսզի պատկերացնեք այդ մարդու մանրախնդրությունը, հետաքրքրվեք և տեսեք, թե Հայաստանի որ մի պաշտոնանկ արված մարզպետն է հեռանալիս իր կաբինետից հետը տանում անգամ շենքի աղբամանները, որը բերել էր Քաջարանի կոմբինատից»,- փաստեց Ս. Ալեքսանյանը:
Վերջինիս համոզմամբ՝ ՀՀ ոչ մի մարզում այնքան կեղծ ֆեյսբուքյան էջեր չկան ու անանուն ստորագրությամբ նյութեր չեն հրապարակվում, որքան Սյունիքում:
«Սյունյաց երկիր» թերթի խմբագիրը նկատեց, որ երկրում տեղի է ունեցել իշխանափոխություն, որը դեռևս բավարար չէ նոր կառավարությունից սյունեցիների ունեցած ակնկալիքների իրականացման առումով, իսկ որ ակնկալիքները շատ են, դա փաստ է:
ՀԱՅԵՐԵՆ
Русский
English
Դաս. հայերեն
French
