Քննարկվել են Բնապահպանության նախարարություն և USAID հայաստանյան առաքելության համագործակցության ընթացքը և հեռանկարները
18-06-2018 18:49:04 | Հայաստան | Տնտեսություն
Բնապահպանության նախարար Էրիկ Գրիգորյանը հանդիպել է ԱՄՆ Միջազգային զարգացման գործակալության /USAID/ հայաստանյան առաքելության Կայուն զարգացման գրասենյակի տնօրեն Լայլա Ջ․Էնդրյուս Բաշանի հետ։
Նախարարը ողջունել է հյուրին, շնորհակալություն հայտնել երկարամյա արդյունավետ համագործակցության համար և, տեղեկացնելով բնապահպանության ոլորտում մեկնարկած բարեփոխումների լայնածավալ միջոցառումների մասին, համոզմունք հայտնել, որ համագործակցությունը USAID-ի հետ էլ ավելի կընդլայնվի՝ ջրային ռեսուրսների կառավարման հարցերից բացի ընդգրկելով նաև այլ ոլորտներ։
Լայլա Ջ․Էնդրյուս Բաշանը շնորհակալություն հայտնելով ընդունելության համար, վերահաստատել է համագործակցության ընդլայնման պատրաստակամությունը և նախարար Գրիգորյանին խնդրել ներկայացնել այն ոլորտները, որոնք բնապահպանական գերատեսչության կողմից համարվում են բարեփոխումների առաջնահերթություններ։
Հանդիպման ժամանակ անդրադարձ է եղել բնապահպանական թույլտվությունների, լիցենզիաների, համաձայնությունների միասնական համակարգի ներդրմանը, Արարատյան դաշտի ստորերկրյա ջրերի օգտագործման առցանց հսկողության համակարգի ներդրմանը, բնապահպանական մոնիթորինգի, տեսչական վերահսկողության համակարգերի կատարելագործմանը, ինչպես նաև անտառային ոլորտի բարեփոխման ուղղությամբ իրականացվող միջոցառումներին վերաբերող հարցերի։
Կողմերը քննարկել են նաև ԱՄՆ ՄԶԳ ֆինանսավորմամբ իրականացվող «Գիտական առաջադեմ տեխնոլոգիաների օգտագործում և համագործակցություն հանուն ռեսուրսների համալիր պահպանության» (ԳԱՏՕ) և «Մաքուր ջուր» ծրագրերի ընթացքը, որոշել դրանց արդյունավետությունը և նպատակայնությունը բարձրացնելու համար աշխատանքային խմբերի պարբերական հանդիպումների միջոցով հստակեցնել գործողությունների պլանները։
ՀԱՅԵՐԵՆ
Русский
English
Դաս. հայերեն
French
