Հերթական անգամ Վիեննայի փաստաթղթի խախտումներով Ադրբեջանն անցկացնում է զորավարժությունները (ՏԵՍԱՆՅՈՒԹ)
03-07-2018 16:42:57 | Հայաստան | Հասարակություն
Հերթական անգամ Վիեննայի փաստաթղթի խախտումներով է Ադրբեջանն անցկացնում զորավարժությունները:
Ինչպես հուլիսի 3-ին լրագրողների հետ նշեց Ադրբեջանի հարցերով փորձագետ Տարոն Հովհաննիսյանը, վերջին տարիներին սովորական երևույթ է դարձել, երբ ադրբեջանական կողմը համապատասխան խողովակներով չի տեղեկացնում հայկական կողմին անցկացվող զորավարժության մասին:
Միաժամանակ փորձագետը նկատեց, որ Վիեննայի փաստաթուղթն իրականում չի հստակեցնում մեխանիզմները, թե ով պետք է հետևի, որպեսզի զորավարժությունների անցկացման մասին փաստաթղթի պահանջները կատարվեն:
«Կարծում եմ՝ այստեղ պետք է հստակեցումներ մտցվեն. Ենթադրենք եվրոպական կառույցները հետևում են, որպեսզի կողմերը հայտարարեն, հակառակ դեպքում որոշակի քայլեր են ձեռնարկում: Եթե նման մեխանիզմ չկա, ապա ոչ մի փաստաթուղթ չի գործի»,- ընդգծեց Տ. Հովհաննիսյանը:
Վերջինիս փոխանցմամբ՝ Նախիջևանի հատվածում ադրբեջանական զինուժի կողմից դիրքերի առաջխաղացումը չի եղել հայկական բանակի դիրքերի հաշվին:
Փորձագետի խոսքերով՝ Գյունութ գյուղի հատվածում հայկական կողմը կարող է ճնշել հակառակորդին, ավելին՝ որոշ տվյալների համաձայն, նման գործողություններ պարբերաբար իրականացվել են:
«Պետք չէ սադրանքների տրվել, բայց մենք էլ մեր հերթին պետք է նրանց լարվածության տակ պահենք՝ հաշվի առնելով այդ հատվածներում մեր որոշակի դիրքերի գերակայությունը»,- նկատեց Տ. Հովհաննիսյանը:
Նրա կարծիքով՝ ադրբեջանական կողմի ագրեսիվ հայտարարությունների մասին անհրաժեշտ է պարբերաբար բարձրացնել միջազգային կառույցներում, մասնավորապես, ԵԱՀԿ Մինսկի խմբի համանախագահող երկրների ներկայացուցիչների մոտ: