Եթե մինչև տարեվերջ ընտրություններ չեղան, Փաշինյանը կկորցնի ամեն ինչ (ՏԵՍԱՆՅՈՒԹ)
07-09-2018 15:18:00 | Հայաստան | Հասարակություն
Եթե մինչև տարեվերջ ընտրություններ չեղան, Փաշինյանը կկորցնի ամեն ինչ:
Նման կարծիք սեպտեմբերի 7-ին լրագրողների հետ հանդիպման ժամանակ հայտնեց Արտակարգ և լիազոր դեսպան, Հայաստանի դիվանագիտական հիմնադրամի նախագահ Արման Նավասարդյանը:
Ըստ նրա՝ մինչև հեղափոխությունը Հայաստանը գտնվում էր շատ ողորմելի վիճակում, մի կողմից դատարկվում էր, մյուս կողմից թալանվում:
«Ներկայիս իրավիճակը երկու բառով կարելի է ասել լավ ստարտ է, որը պետք է կարողանալ պահել»,- նկատեց Ա. Նավասարդյանը՝ հավելելով, որ Թավշյա հեղափոխություն թավշյա ձեռնոցներով չի կարող լինել, հետևաբար անցումային արդարադատությունն ու խորհրդարանի կազմալուծումն անհրաժեշտություն են:
Անդրադառնալով Ռուսաստանի հետ հավասար գործընկերային կարգավիճակով համագործակցելու Հայաստանի նոր իշխանությունների ձգտումներին՝ բանախոսն ընդգծեց, որ այդ հարցում պետք է համբերատարություն դրսևորել:
«Կարծում եմ իրենց հետ պետք է շատ համառ ու համբերատար կերպով աշխատել՝ ասելով, որ այլևս նման բան չի լինելու, որ իրադրություն է փոխված, և փոխված է ամբողջ ազգի մենթալիտետը, հոգեբանությունը, մարդկանց մտածելակերպը»,- շեշտեց Ա. Նավասարդյանը:
Վերջինիս կարծիքով՝ այս նոր քաղաքական աշխարհում Հայաստանը գնում է մի ճանապարհով, որով ոչ ոք չի գնացել: