ՀՀ վարչապետ Նիկոլ Փաշինյանի հրաժարականը և դրանից հետո ակնկալվող ԱԺ-ի լուծարումը, ըստ «Մոդուս Վիվենդի» կենտրոնի ղեկավար, քաղաքագետ Արա Պապյանի, կարևորագույն իրադարձություն են լինելու: 

«Դա հեղափոխության ամրագրումը պիտի լինի, որովհետև, ըստ էության, խորհրդարանական երկրեում իշխանությունը պատկանում է խորհրդարանին, և առանց արտահերթ ընտրությունների և նոր խորհրդարանի ձևավորման, մենք երբեք չենք կարող խոսել հեղափոխության մասին,- այսօր «Նոյյան Տապան»-ի ուղիղ եթերում հեռարձակվող «Քննարկում» հաղորդաշարի ընթացքում ասաց Արա Պապյանը:- Վտանգները շատ են, իմ կարծիքով: Արդեն, ըստ էության, երևի անշրջելի է, քանի որ Նիկոլ Փաշինյանը նշել է ամսի 16-ին իր հրաժարականի մասին, և որպես դրա հետևանք, դեկտեմբերի 9-ին կլինեն արտահերթ ընտրությունները: Հրաժարականից հետո երկու շաբաթվա ընթացքում (մեկ շաբաթ գումարած մեկ շաբաթ) երկու ընտրություններ չպետք է տեղի ունենան, այսինքն՝ չպետք է առաջադրվի վարչապետի որևէ այլ թեկնածու և չպետք է ընտրվի: Այ, վտանգը ես այստեղ եմ տեսնում: Թեև տարբեր խոստումներին գրավոր և բանավոր, օրինակ, «Բարգավաճ Հայաստանը» գրավոր, ոմանք բանավոր են խոստումներ տվել, ամեն պարագային չի կարելի բացառել, որ այդ ուժերը կարող են դրժել իրենց խոսքը (իսկ սա առաջին դեպքը չէ, որ դրժում են), և առաջադրել ու մինչև իսկ ընտրել իրենց վարչապետը: Սա հանգեցնելու է իրավիճակի, որ միայն ժողովրդական ճնշման պարագային… Չգիտեմ ինչպես պետք է խնդիրը լուծվի: Ես և շատ-շատերը կողմնակից էինք մի փոքր այլ տարբերակի, որ հանրաքվեի միջոցով այս ամբողջն արվի: Այնտեղ էլ վտանգներ կան, իհարկե, այն առումով, որ էլի կախված ես խորհրդարանի համաձայնությունից և Սահմանադրական դատարանի եզրակացությունից: Բայց նրանց անհամաձայնությունը կամ, ասենք, այլ եզրակացությունը չի բերում նրան, որ իշխանությունը քո ձեռքից խլում են, պարզապես վիճակը մնում է անփոփոխ, այսինքն՝ դա կարելի էր փորձել, չլինելու պարագային կաուկա այս երկու շաբաթանոց ձևը, որ պետք է ընտրեն կամ չընտրեն: Մյուս կողմից այս ձևը, որ երկու շաբաթ չպետք է ընտրեն, պետք է տեղի ունենա ժողովրդի ճնշման ներքո»:

Ըստ «Քննարկում» հաղորդաշարի հյուրի, հասկանալի է, որ ԱԺ-ի լուծարման համար հանրաքվեի տարբերակն ընտրելու դեպքում, շատ ավելի հեշտ և ավելի անվտանգ էր լինելու Սահմանադրական դատարանի եզրակացությունը և Ազգային ժողովի համաձայնությունը կորզել և էլի գնալ սահմանադրական ճանապարհով արտահերթ ընտրությունների: Ինչպես պարոն Պապյանը նշեց, կա նաև երրորդ տարբերակը, որի մասին ինքը նախկինում նույնպես նշել է, դա ավելի հեղափոխական տարբերակն էր, երբ իրականացվում է հարցախույզ պլեբիսցիդ տարբերակով, այսինքն՝ կատարման համար ոչ պարտադիր հանրաքվե, գրավոր, ստորագրահավաքի միջոցով հարցնում ես ժողովրդին՝ արդյոք ժողովուրդը համաձայն է արտահերթ ընտրությունների, ժողովուրդը տալիս է իր համաձայնությունը, դու հղում կատարելով Սահմանադրության երկրորդ հոդվածի վրա, որ իշխանությունը պատկանում է ժողովրդին, ի կատար ես ածում ժողովրդի ցանկությունը, այսպես ասած, ավելի շատ հեղափոխական ուժով:

Նշելով, որ հիշյալ երեք տարբերակից վարչապետն ընտրել է իր հրաժարականի ճանապարհը, որը, ինչպես քաղաքագետը հարկ համարեց կրկնել, ունի իր մեջ վտանգներ, լի է այդ վտանգներով, Արա Պապյանն ասաց, որ, այնուամենայնիվ, քանի որ այդ տարբերակն է ընտրվել, ինքն ամեն ինչով աջակցելու է վարչապետին, «որպեսզի հանկարծ այդ վատագույն տարբերակը չիրականանա, որովհետև այդ վատագույն տարբերակը կբերի շատ լուրջ լարվածության երկրի ներսում, և այդտեղից էլ կածանցվեն արտաքին որոշ վտանգներ»:

 

Երևանի ժամանակով ժամը 10:00-ից 11։00-ը հաղորդմանը կարելի էր հետևել ԱՄՆ հայկական AABC հեռուստաընկերության ուղիղ եթերում, ինչպես նաև առցանց՝ «Նոյյան Տապան»-ի www.nt.am կայքով, «Նոյյան Տապան» հեռուստաընկերության Youtube-յան ալիքով, «Նոյյան Տապան» ֆեյսբուքյան էջում և «Noyan Tapan»‰  ֆեյսբուքյան խմբում։

Ուղիղ եթերից հետո բանախոսին ուղղված հարցերն ու մեկնաբանությունները կարելի է թողնել՝ զանգհարելով ամերիկյան 818 9675321 և հայաստանյան 060 351131 հեռախոսահամարներով։ Ձեր խոսքի ձայնագրությունները հետագայում կօգտագործվեն «Հետադարձ կապ» հաղորդաշարում։

 

Նոյյան տապան  -   Քննարկում