Ամեն տարի չհելիոֆիկացնելով Հայաստանը և Արցախը՝ կորցնում ենք 700 մլն դոլար ու ենթարկվում ՌԴ քաղաքական ճնշումներին. գիտնական (ՏԵՍԱՆՅՈՒԹ)
18-01-2019 17:01:53 | Հայաստան | Գիտություն եւ տեխնոլոգիաներ
Հայաստանի արևային պաշարն ավելի շատ է, քան ողջ աշխարհի էներգետիկ պահանջարկը:
Այս մասին հունվարի 18-ին լրագրողների հետ հանիպման ժամանակ նշեց «Հայաստանի հելիոֆիկացիայի ծրագրի» հեղինակ, տեխնիկական գիտությունների դոկտոր Վահան Համազասպյանը:
Ըստ նրա՝ իր մոտավոր հաշվարկները ցույց են տվել, որ Հայաստանով անցնող արևը կարող է աշխարհի էներգետիկ պահանջարկը բավարարել 21 անգամ, ինչը նշանակում է, որ քաղաքական կամքի դեպքում Հայաստանը կարող է ոչ միայն ամբողջությամբ հելիոֆիկացվել, այլև դառնալ արևային տեխնիկայի արտադրության ոլորտում աշխարհի կենտրոն:
«Ես հիմա հետապնդում եմ Սպիտակի պատրաստի գործարանը քանդողներին, որտեղ մենք կարող էինք կազմակերպել արևային տեխնիկայի արտադրություն և աշխարհում առաջինը անցնեինք դրանց մասայական օգտագործման: Ինչու քանդեցին, չգիտենք, գիտենք, որ քանդողները դավաճաններ են: Բազմաթիվ անգամ խնդրեցինք գործարանը չքանդել, փոխարնեը պատրաստ էինք հանգանակության միջոցով նրանց փոխանցել գործարանի քանդումից ստացվելիք շահույթը»,- նշեց Վ. Համազասպյանը:
Վերջինիս խոսքերով՝ հելիոֆիկացիայի իրենց մշակած ծրագիրն ունի տնտեսական մեծ նշանակություն նաև այն առումով, որ վարչապետ Նիկոլ Փաշինյանը խնդիր է դրել տնտեսության մեջ ևս հեղափոխություն կազմակերպել:
Նրա համոզմամբ՝ տնտեսական հեղափոխություն կլինի, եթե զարկ տրվի հելիոֆիկացիայի ծրագրի իրականացմանը:
Գիտնականը նկատեց՝ ներկայումս աշխարհը գնում է էկոլոգիան փրկելու ճանապարհով, մինչդեռ իրենք առաջարկում են հատկապես գյուղացիներին այնպիսի տեխնիկա և տեխնոլոգիաներ տրամադրել, որոնք օգտագործելով՝ նրանք նախ շահույթ կստանան և հետո ինքնաբերաբար կփրկեն բնությունը:
«Եթե Հայաստանը և Արցախը հելիոֆիկացվեն 20 կՎտ-ոց արևային սարքերով, ապա առկա 350 հազար գյուղացիական տնտեսությունները կարտադրեն այնքան էներգիա, որքան կտար 5 ատոմակայան: Ամեն տարի չհելիոֆիկացվելով՝ մենք կորցնում ենք 700 մլն դոլար և իզուր տեղը Ռուսաստանից գազ ենք բերում, ենթարկվում քաղաքական ճնշումների և այլն»,- ընդգծեց Վ. Համազասպյանը:
Բանախոսը հույս հայտնեց, որ մի օր իշխանությունները չեն լինի անտարբեր և իսկապես կհետաքրքրվեն Հայաստանը հելիոֆիկացնելով իրենց ծրագրով, որն իրագործելու դեպքում զարգացում կապահովվի կյանքի բոլոր ոլորտներում: