Վարչապետը կոչ արեց ամերիկահայ համայնքին Ցեղասպանության ճանաչումն այս պահին դնել մի կողմ և առաջ շարժվել. Սուրեն Սարգսյան
27-09-2019 14:32:59 | Հայաստան | Միջազգային
Լոս Անջելեսում վարչապետի հետ հանդիպման ձևաչափը բացառիկ էր, որովհետև մինչ այդ նման ձևաչափով Հայաստանի որևէ ղեկավար հանդիպում չէր ունեցել:
Այս մասին սեպտեմբերի 27-ին լրագրողների հետ հանդիպման ժամանակ նշեց միջազգայնագետ Սուրեն Սարգսյանը՝ ամփոփելով վարչապետ Նիկոլ Փաշինյանի ԱՄՆ կատարած այցը:
Ըստ նրա՝ ամերիկահայ համայնքը նույն ոգևորությամբ 1990-ականներին դիմավորել են Լևոն Տեր-Պետրոսյանին, բայց հանդիպումը փակ տարածքում է եղել:
Ս. Սարգսյանի խոսքերով՝ համայնքի հետ հանդիպման ժամանակ Նիկոլ Փաշինյանի արտահայտած թեզերը նոր չէին, դրանք վերաբերում էին հայրենադարձությանը, Հայաստանում ներդրումներ անելուն ու տնտեսության զարգացմանը:
«Այստեղ կարևոր էր մի առանձանահատուկ մոտեցում, որ եթե այսպես ասած թարգմանենք վարչապետի խոսքը, ապա նա մոտավորապես ասում էր, որ Ցեղասպանությունը որպես առաջնահերթություն՝ պետք է փոխարինվի Հայաստանի տնտեսական զարգացմամբ և ընդհանրապես Հայաստանի անվտանգության ապահովմամբ»,- նկատեց միջազգայնագետը:
Վերջինիս փոխանցմամբ՝ դա նշանակում է, որ վարչապետը կոչ է անում ամերիկահայ համայնքին Ցեղասպանության ճանաչումն այս պահին դնել մի կողմ և առաջ շարժվել՝ հաշվի առնելով ՀՀ շահերն այսօրվա դրությամբ:
«Անձամբ իմ կարծիքով՝ ԱՄՆ-ում ֆեդերալ մակարդակով Ցեղասպանությունը չի ճանաչվելու, որովհետև ԱՄՆ-ն այս հարցում չեն կարող սուվերեն որոշում կայացնել, որովհետև նման որոշման կայացումը չի բխելու իրենց ռազմավարական դաշնակցի՝ Թուրքիայի շահերից, որքան էլ այսօր իրենց հարաբերությունները լարված լինեն»,- ընդգծեց Ս. Սարգսյանը:
Նա առանձնացրեց նաև Հայաստանի վարչապետի հանդիպումը համայնքային կազմակերպությունների և լոբբիստական կառույցների հետ:
ՀԱՅԵՐԵՆ
Русский
English
Դաս. հայերեն
French
